တၢ်အိၣ်ဖှိၣ်သရၣ်အတၢ်ကတိၤ

ဘၣ်မနုၤအဃိပလိၣ်ဘၣ်တၢ်အိၣ်ဖှိၣ်လဲၣ်. ပကွၢ်ကဒါက့ၤပတၢ်အိၣ်မူလၢထံလီၢ်ကီၢ်ပူၤအကတီၢ်မ့ၢ်ဂ့ၤ,လၢဒဲကဝီၤပူၤအကတီၢ်မ့ၢ်ဂ့ၤပလဲၤတၢ်တဆီဘၣ်တဆီလၢတၢ်ကီတၢ်ခဲအပူၤ, လၢတၢ်မဲာ်ထံမဲာ်နိအပူၤ,လၢတၢ်ဟီၣ်တၢ်ယၢၤအပူၤ,ဘၣ်ဆၣ်ပတလီၤမၢ်ဘၣ်မ့ၢ်လၢပအိၣ်ဒီးခရံာ်အတၢ်အိၣ်ဖှိၣ်ဒီးအတၢ်ကရၢကရိအဃိလီၤ. ပယီၤကလုာ်ဒိၣ်စိဂုာ်ကျဲးစၢးဝဲဒၣ်ဆူၣ်ဆူၣ်ကလဲာ်ဒ်သိးပကလီၤမၢ်ဒီးစံးဝဲလၢမုၢ်ကအိၣ်ဝဲတနံၤန့ၣ်ပှၤမ့ၢ်အဲၣ်ဒိးထံၣ်ဘၣ်ကညီဖိန့ၣ်ကဘၣ်လဲၤကွၢ်ဝဲဒၣ်လၢတၢ်ကွၢ်ကီအလီၢ်န့ၣ်လီၤ. လၢယ့ၣ်ၡူးခရံာ်အမံၤတၢ်ကတိၤအဝဲအံၤလၢထီၣ်ပှဲၤထီၣ်ဝဲတသ့နီတဘျီဘၣ်. တၢ်မၤတံာ်တာ်ပှၤလၢတၢ်ကိးမံၤဒဲးဘၣ်ဆၣ်ဒီး,တၢ်ဆီၣ်အံၣ်လီၤပတၢ်တမ့ၢ်ဘၣ်,ပကမၤဒ်လဲၣ်ဒ်လဲၣ်ပကူၣ်တဘၣ်ဘၣ်,မ့ၢ်မ့ၢ်ပတၢ်မုၢ်လၢ်တဟါမၢ်ဘၣ်. တၢ်မၤအၢမၤနးပှၤဘၣ်ဆၣ်ဒီးတၢ်တလဲၤသဒၣ်ဘၣ်ပှၤဘၣ်. တၢ်မၤလီၤဃံၢ်ပှၤဘၣ်ဆၣ်ဒီး,ပတဟးဂီၤဘၣ်. ပစိာ်ယ့ၣ်ၡူးအတၢ်ဒိးသံအသးလၢပနီၢ်ခိတဘိယူၢ်ဃီ,ဒ်သိးယ့ၣ်ၡူးအတၢ်မူကအိၣ်ဖျါထီၣ်စ့ၢ်ကီးလၢပနီၢ်ခိလီၤ. (၂ ကရံၣ်သူး ၄ : ၈-၁၀).

ကစၢ်ယွၤမၤစဲဃဲၤတၢ်အဒိၣ်လၢပဂီၢ်ဒီးပသးခုလၢအဃိဒိၣ်မးလီၤ. စီၤယိၤသးလီၤဘၣ်လၢဃိာ်ပူၤ,အိၣ်ဘၣ်ဖှီၣ်ဖှီၣ်နးနးဘၣ်ဆၣ်လၢတၢ်နာ်ယွၤအဃိယွၤသုးထီထီၣ်အလီၢ်ဆူကိတိာ်ခိၣ်ခံန့ၣ်လီၤ. တဘျီအခါပမံဘၣ်လၢသ့ၣ်ခီၣ်ထံး,လၢကျူသၢဘိကဟံးသၢခဲးအဖီလာ်,မံဘၣ်လၢသွဲခိၣ်,ဖုဒါခိၣ်မုၢ်နၤခီဃီၤအ့ၣ်စိၢ်ပချၢဆါနးလဲၣ်. အခဲအံၤပမံနီၤပချၢဃံလီၤယၢၣ်ပခီၣ်လီၤဘျၢၣ်တကပိာ်မးလၢပလီၢ်မံခိၣ်လီၤ. တၢ်ဝဲအံၤမ့ၢ်ဝဲတီဝဲဒ်ယွၤအကလုၢ်ကထါအသိး. အဂ့ၢ်ဒ်အံၤပသ့ၣ်ညါလၢပှၤလၢအအဲၣ်ယွၤပှၤလၢအဘၣ်တၢ်ကိးအီၤဒ်တၢ်ကူၣ်ပာ်အသိးတဖၣ်န့ၣ်တၢ်ခဲလၢာ်မၤဃုာ်အသးလၢတၢ်ဂ့ၤအဂ့ၢ်လၢအဂီၢ်လီၤ(ရိမ့ၤ ၈ : ၂၈). ပမ့ၢ်တလဲၤခီဖျိဘၣ်တၢ်ကီတၢ်ခဲအံၤဘၣ်ဒီးပတအီၣ်ဘၣ်ဒံးတၢ်ဘီၣ်တၢ်ညီအသၣ်အံၤဒံးဘၣ်. ပကဘၣ်တဲစိၤန့ၢ်ပဖိပလံၤလၢတၢ်ဂ့ၢ်သ့ၣ်တဖၣ်အံၤဒ်သိးဒီးကသ့ၣ်ညါဝဲဒၣ်လၢဘၣ်မနုၤအဃိပမိၢ်ပၢ်ဟဲအိၣ်ယုၤပှၤလၢကီၢ်အံၤလဲၣ်န့ၣ်လီၤ.

တၢ်တဲစိၤအိၣ်ဝဲဒၣ်လၢတုၤမ့ၢ်ထိၣ်ဖးဒိၣ်ကယူၤစိာ်ပှၤဒီးကတ့ၢ်လီၤပှၤဆူဒိးတကါအကီၢ်လီၤ. ဒီးဖဲန့ၣ်ဒိးတကါကအီၣ်တူာ်ပှၤလီၤ. လီၤပျံၤဒိၣ်လဲၣ်. တၢ်ဝဲအံၤမ့ၢ်ဝဲတီဝဲကစီဒီလီၤ. ပတနၢ်ဟူကျိၣ်သီၣ်ကျိသဲ,တၢ်ဟီၣ်တၢ်ယၢၤလၢတၢ်ပျံၤတၢ်ဖုးအဃိ,တၢ်ကအုကစွါလၢတၢ်အီၣ်တၢ်အီတအိၣ်အဃိနီတမံၤဘၣ်. ဘၣ်ဆၣ်ပထံၣ်ဘၣ်ဒိးတကါအါမးအခိၣ်ဖုရုဒီးကးဂီၤလုးဂီၤဃဲး,အိၣ်ဒီးအတပဲၢ်,အဘ့ၣ်ဘၢဘၢတဘၢဘၢ. အၢၤ. အဝဲအံၤမးဒိးတကး. ဒိးတကးတဖၣ်အံၤတအီၣ်ပှၤဘၣ်. ဘၣ်ဆၣ်ပပှၤကညီလူၤကွၢ်ဟုၣ်ကွၢ်စူၣ်အီၤဒီးကယီကယီန့ၣ်လူၤပိာ်ထွဲမၤဒိးဝဲအခံလီၤ. လၢတၢ်အံၤအဃိလီၤကွံာ်ဝဲဒၣ်ဆူဒိးတကးအထၢပူၤန့ၣ်လီၤ.

ပဝဲဒၣ်ဝဲၤရဘံၤကညီဘျၢထံတၢ်အိၣ်ဖှိၣ်အံၤပတၢ်ပညိၣ်မ့ၢ်ဒၣ်လၢပကသူၣ်ထီၣ်ခရံာ်အတၢ်အိၣ်ဖှိၣ်နီၢ်နီၢ်လၢကညီဖိအသိးအကျါလီၤ. တမ့ၢ်ပသူၣ်ထီၣ်ကညီဖိအတၢ်အိၣ်ဖှိၣ်,အတၢ်ကရၢကရိဘၣ်. ပှၤကိးဂၤဒဲးလၢအဟဲအိၣ်ဟဲဆိးဖဲမဲလ်ဘိအဝ့ၢ်မုၢ်နုာ်တဖၣ်ဒ်သိးဒီးကန့ၢ်ဘၣ်ကစၢ်ယ့ၣ်ၡူးခရံာ်နီၢ်နီၢ်လၢအတၢ်အိၣ်မူအပူၤန့ၣ်မ့ၢ်ဝဲဒၣ်သ့ၣ်တဖၣ်အတၢ်မၤန့ၣ်လီၤ.

မ်ယွၤမၤမူထီၣ်ကညီဖိသ့ၣ်တဖၣ်အံၤတက့ၢ်.
က့လ်မိၣ်ဒွဲၣ်
ဝဲၤရဘံၤကညီဘျၢထံတၢ်အိၣ်ဖှိၣ်