ဝဲရဘံၤကညီဘျၢထံတၢ်အိၣ်ဖှိၣ်အခီၣ်ထံးခီၣ်ဘိ

ကစၢ်ယ့ၣ်ၡူးသံကွၢ်အပျဲၢ်အဘီၣ်, ပှၤစံးလၢယမ့ၢ်မတၤလဲၣ်မ့မ့ၢ်သုဝဲသုကစံးလၢယမ့ၢ်မတၤလဲၣ်. စီၤပ့းတရူးစံးဝဲ, နမ့ၢ်ခရံာ်ယွၤလၢအမူဝဲတဂၤအဖိခွါလီၤ. လၢလၢၢ်အံၤအဖီခိၣ်ယကသူၣ်ထီၣ်တၢ်အိၣ်ဖှိၣ်လီၤ. ကီၢ်အီးစထြ့လံယါအံၤမ့ၢ်ဒၣ်တၢ်လီၢ်ဃ့ထီသ့ၣ်တဖၣ်လီၤ. သ့ၣ်အိၣ်ဝဲဒၣ်စှၤကလုာ်ဒီးပှၤလၢဟဲနုာ်လီၤအိၣ်ဆိးလၢအခီၣ်ထံးခီၣ်ဘိတဖၣ်ဟဲစိာ်ဃုာ်ဝဲဒၣ်ဒီး တၢ်မုၢ်တၢ်ဘိ, သ့ၣ်ထူၣ်ဝၣ်ဘိတဖၣ်, ဆၣ်ဖိကီၢ်ဖိတဖၣ်, ဃုာ်ဒီးအတၢ်သ့တၢ်ဘၣ်ဒီးမၤထူးမၤတီၤထီၣ်ဝဲဒၣ်ကီၢ်အီးစထြ့လံယါန့ၣ်လီၤ. မ့မ့ၢ်ပဝဲကညီဖိတဖၣ်ပဟဲစိာ်တၢ်မနုၤလဲၣ်. ပဟဲလၢဘၣ်နးဘၣ်ဖှီၣ်အလီၢ်ကဝီၤ, ပဟဲဒၣ်ထဲထၢၣ်ကွ့လ့တဖျၢၣ် အိၣ်ဒၣ်ဒီးဆ့ကူဆ့ကၤတဘ့ၣ်ခံဘ့ၣ်လၢအပူၤဒီးလၢပစုပစိာ်ဒၣ်အၣ်အိၣ်အဲမ် (IOM) အထၢၣ်တဖျၢၣ်လီၤ. မ့ၢ်လၢပသ့ၣ်ညါကစၢ်ယ့ၣ်ၡူးခရံာ်မ့ၢ်ယွၤလၢအမူဝဲတဂၤအဖိခွါအဃိပမ့ၢ်လၢၢ်တဖၣ်ဒီးလၢလၢၢ်အံၤအဃိတၢ်အိၣ်ဖှိၣ်အိၣ်ထီၣ်ဝဲလီၤ. အဝဲအံၤမ့ၢ်ဝဲဒၣ်ဝဲၤရဘံၤကညီဘျၢထံတၢ်အိၣ်ဖှိၣ်စးထီၣ်သီအသးပှၤကရၢကရိတၢ်သ့ၣ်တဖၣ်.

How it all begin

ဝဲၤရဘံၤကညီဘျၢထံတၢ်အိၣ်ဖှိၣ်အံၤအိၣ်သူၣ်လီၤအသးဖဲဝ့ၢ်ဝဲၤရဘံၤအပူၤဒီးမ့ၢ်ဝဲဒၣ် (Werribee Baptist Church) တၢ်အိၣ်ဖှိၣ်အဒ့တဖုလီၤ. တၢ်အိၣ်ဖှိၣ်အံၤဘၣ်တၢ် ရဲၣ်ကျဲၤထံၣ်လိာ်အိၣ်သကိးသးဒီးကညီခိၣ်နၢ်စှၤဂၤဒီးသရၣ်ဒိၣ် Mark ဒီးတၢ်အိၣ်ဖှိၣ် သးပှၢ် Drew န့ၣ်လီၤ. ဒ်တၢ်အၢၣ်လီၤတူၢ်လိာ်ဒီးတၢ်သ့ၣ်နံၤဖးသီအဆၢကတီၢ်အသိးကညီတၢ်ဘါအံၤစးထီၣ်အိၣ်ထီၣ်ဝဲဖဲ လါမ့ၤ 4 သီ, 2008 နံၣ်န့ၣ်လီၤ. ခိဖျိပဒီပုၢ်ဝဲၢ်ကိၤလၤဝါတဖၣ်အတၢ်အဲၣ်ဒီးအတၢ်သူၣ်အိၣ်သးအိၣ်ပှၤအဃိပန့ၢ်ဘၣ်တၢ်ခွဲးဂ့ၤ ယာ်ဘၣ်လၢ ပကဘူၣ်ထီၣ် ဘါထီၣ်ယွၤလၢတၢ်သဘျ့အပူၤပှဲၤဒီးတၢ်အဲၣ်တၢ်ပာ်သးတဖျၢၣ်ဃီန့ၣ်လီၤ. တၢ်အိၣ်ဖှိၣ်စးထီၣ်သးထဲဟံၣ်ဒူၣ်သၢဆံသၢဒူၣ်ဒီးတၢ်အိၣ်ဖှိၣ်ဖိကအိၣ် 85 - 100 ဂၤဃၣ်ဃၣ်န့ၣ်လီၤ. တၢ်အိၣ်ဖှိၣ်ဖိတဖၣ်အါတက့ၢ်မ့ၢ်ဒၣ်ပှၤလၢအအိၣ်ဆိးဝဲဒၣ်လၢဝ့မ်ဒၢၣ်အပူၤန့ၣ်လီၤ. ယွၤအဲၣ်ပဝဲပှၤကညီဖိတဖၣ်ဒိၣ်မးထုးထီၣ်ကွံာ်ပှၤလၢဘၣ်ကီဘၣ်ခဲဒဲကဝီၤဆှၢပှၤဆူအီးစထြ့လယၣ်ဒီးထံကီၢ်အါဘ့ၣ်ဒ်တဘျီအခါအဝဲထုးထီၣ်ပှၤအံၣ်စရ့လးဖိလၢကီၢ်အဲးကူပတူးအသိးန့ၣ်လီၤ. ယွၤမၤတၢ်အံၤလီၤလိၢ်လီၤလးမးဒီးအတၢ်မၤအံၤတလၢာ်ပစ့နီတဘးဘၣ်.ယွၤမၤတၢ်လၢအကတီၢ်ဒၣ်ဝဲဒီးပတစံးဘျုးအီၤဘၣ်ဒီးပအိၣ်တသ့ဒ်လဲၣ်. ယွၤအဲၣ်ဒီးလၢပကမၤထီၣ်အတၢ်အိၣ်ဖှိၣ်ဖဲဝဲၤရဘံၤအံၤလၢအလၤကပီၤကအိၣ်ဖျါထီၣ်အဂီၢ်လီၤ. တၢ်အိၣ်ဖှိၣ်အံၤလဲၤထီၣ်လဲၤထီတ့ၢ်ဝဲဒီးကလဲၤထီၣ်ဒံးဆူညါန့ၣ်ပစံးပဝဲသ့ဒီးပသမၢအလီၢ်တအိၣ်ဘၣ်. မ်ယွၤကဆိၣ်ဂ့ၤပတၢ်အိၣ်ဖှိၣ်တဖုအံၤဒီးဂံၢ်အါထီၣ်ပချံပသၣ်ဒ်စီၤအၤဘြၣ်ဟၣ်အသိးန့ၣ်တက့ၢ်. အၤမ့ၣ်.