တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ပှၤကလူၤဖ့ၣ်ထုးနဆ့အနွံဒီးသးအိၣ်လဲၤတၢ်ဒီးနၤ

ဝံစကၤရယၤ 8:23 တၢ်သုးမုၢ်ဂီၢ်မုၢ်အယွၤစံးဒ်အံၤ,တၢ်လၢမုၢ်နံၤတဖၣ်န့ၣ်,ပှၤဆံဆဲၣ်ဂၤလၢပှၤကလုာ်ခဲလၢာ်အကျါန့ၣ်ကဟံးဃာ်တၢ်,ကဟံးဃာ်ဒၣ်လဲာ်ပှၤယူဒၤဖိတဂၤအဆ့သရ့ၤ,ဒီးစံး,ပကလဲၤတၢ်ဒီးသုလီၤ.အဂ့ၢ်ဒ်အံၤ,ပနၢ်ဟူလၢကစၢ်အိၣ်ဝဲဒီးသုလီၤ.

ယွၤအပှၤဂီၢ်မုၢ်အံၣ်စရ့လးတဖုအံၤမ့ၢ်ပှၤတကလုာ်လၢယွၤဃုထၢအီၤလီၤလီၤဆီလၢကမၤယွၤအတၢ်ခီဖျိတၢ်ယူာ်ထီၣ်ထီယွၤအမံၤန့ၣ်လီၤ.မ့ၢ်လၢအဝဲသ့ၣ်တဖၣ်ဃၣ်ကွံာ်အသးဆူတၢ်အၢတၢ်သီဒီးဃုကစၢ်အဂုာ်အဂၤအဃိအတၢ်အိၣ်မူအသူးအသ့ၣ်,အလၤကပီၤဟးဂီၤကွံာ်ဝဲဒၣ်န့ၣ်လီၤ.ဘၣ်ဆၣ်တုၤမ့ၢ်အဝဲသ့ၣ်ဃၣ် ကွံာ်အသးလၢကျဲအၢဒီးပာ်တ့ၢ်ကွံာ်ကစၢ်အဂုာ်အဂၤန့ၣ်ယွၤအလၤကပီၤအိၣ်လၢအလိၤဒီးပှၤကလုာ်အါဖုထံၣ်ဘၣ်ယွၤအစိကမီၤဒီးသးအိၣ်လူၤပိာ်အဝဲသ့ၣ်အခံန့ၣ်လီၤ.

ပဝဲဒၣ်တဂၤဘၣ်တဂၤစုာ်စုာ်စ့ၢ်ကီးပကလဲၤခီဖျိဘၣ်တၢ်ကွၢ်တလီၤ,တၢ်ဆိကမိၣ်ဆံးပှၤ,တၢ်လဲၤကပာ်ပှၤလၢပမ့ၢ်ပှၤဘၣ်ကီဘၣ်ခဲဖိအဃိမ့ၢ်ဂ့ၤ,ပှၤလၢတၢ်ကူၣ်ဘၣ်ကူၣ်သ့တအိၣ်ဘၣ်အဃိမ့ၢ်ဂ့ၤ,ပှၤလၢတၢ်သ့ တၢ်ဘၣ်တအိၣ်ဘၣ်အဃိမ့ၢ်ဂ့ၤန့ၣ်လီၤ.တၢ်သ့ၣ်တဖၣ်အံၤမ့ၢ်ဒၣ်ဟီၣ်ခိၣ်အန့ဆၢၣ်လီၤ.မ့မ့ၢ်တၢ်လၢပကဘၣ်သးခုလၢကစၢ်ယွၤအတၢ်အၢၣ်လီၤအီလီၤအပူၤတခီန့ၣ်မ့ၢ်ဒၣ်ယွၤအတၢ်အၢၣ်လီၤအီလီၤပှၤလၢဖဲဒၣ်ပှၤလၢအကစၢ်မ့ၢ်ယွၤန့ၣ်ပှၤကသ့ၣ်ဝဲလၢပမ့ၢ်ယွၤအဖိဒီးပှၤကလုာ်တဖၣ်ကသးအိၣ်မၤသကိးတၢ်ဒီးပှၤ,ကဃ့ကညးပှၤတုၤဒၣ်လဲာ်ကလူၤဖ့ၣ်ထုးပဆ့အနွံဒီးအဲၣ်ဒိးလဲၤတၢ်ဒီးပှၤန့ၣ်လီၤ.

ယွၤအကလုၢ်ကထါအတၢ်အၢၣ်လီၤအီလီၤန့ၣ်မ့ၢ်ဝဲတီဝဲလီၤ.”မ့မ့ၢ်သုဝဲသ့ၣ်အံၤ,သုမ့ၢ်တၢ်အစၢၤအသွဲၣ်လၢအဘၣ်တၢ်ဃုထၢအီၤ,ပှၤလုၢ်တၢ်အဒိၣ်စီၤပၤ,ပှၤစီဆှံတကလုာ်,ပှၤဂီၢ်မုၢ်လၢတၢ်ပှ့ၤက့ၤအီၤ,ဒ်သိး သုကလီၣ်ဖျါထီၣ်ပှၤလၢအကိးန့ၢ်သုလၢတၢ်ခံးဆူတၢ်ကပီၤလီၤလးအပူၤတဂၤ,အတၢ်ဂ့ၤတၢ်ဝါန့ၣ်လီၤ.လၢထံးလၢမကိးန့ၣ်သုတမ့ၢ်ဘၣ်ပှၤတကလုာ်ဘၣ်,မ့မ့ၢ်ခဲကနံၣ်အံၤ,သုမ့ၢ်ယွၤအပှၤတကလုာ်လီၤ”. 1ပ့းတရူး 2:9.

ကစၢ်ယွၤဆိၣ်ဂ့ၤပှၤန့ၣ်တမ့ၢ်ဘၣ်လၢပကစၢ်ဒၣ်ဝဲပဂီၢ်ဘၣ်.အဝဲဒၣ်ဆိၣ်ဂ့ၤပှၤမ့ၢ်ဒံးသိးပကကဲထီၣ်တၢ်ဆိၣ်ဂ့ၤလၢပှၤအါဂၤအဂီၢ်လီၤ.ပှၤတနီၤနီၤဟံးန့ၢ်ယွၤအတၢ်ဆိၣ်ဂ့ၤလၢတၢ်အဲၣ်လီၤသးဒၣ်ဝဲအဂီၢ်လီၤ.ယွၤအတၢ်ဆိၣ်ဂ့ၤလၢပဖီခိၣ်န့ၣ်တမ့ၢ်လၢအအဲၣ်ပှၤလီၤဆီဒိၣ်န့ၢ်ဒံးပှၤအဂၤအဃိဘၣ်.တၢ်ဆိၣ်ဂ့ၤန့ၣ်ပိာ်ထွဲထီၣ်အခံဒီးမူဒါသ့ၣ်တဖၣ်လီၤ.

တၢ်ထုကဖၣ်- ပၢ်ကစၢ်ယွၤဧၢ,ယစံးဘျုးနၤလၢယသ့ၣ်ညါနၤဒ်ကစၢ်လၢပၢဆှၢယတၢ်အိၣ်မူတဂၤအသိးအဃိလီၤ.သူ ယၤဒံးတၢ်ပိးတၢ်လီတခါအသိးလၢကကဲထီၣ်တၢ်ဆိၣ်ဂ့ၤလၢပှၤအါဂၤအဂီၢ်အဃိန့ၣ်တက့ၢ်. လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်… အၤမ့ၤ