တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ဃ့ကညးခံဘျီ,ဆီၣ်လီၤသးခံဘျီ

မးသဲ 15:26-27

ယ့ၣ်ၡူးစံးဝဲဒၣ်,တၢ်လၢဖိတဖၣ်အတၢ်အီၣ်တၢ်အီန့ၣ်တဂ့ၤဟံးန့ၢ်ဒီးကွံာ်လီၤလၢထွံၣ်တဖၣ်န့ၣ်ဘၣ်.ဒီးပိာ် မုၣ်စံးဝဲဒၣ်,မ့ၢ်လံ,ကစၢ်ဧၢ,အဂ့ၢ်ဒ်အံၤ,ထွံၣ်ဒၣ်လဲာ်အီၣ်တၢ်အိၣ်ဘျဲၣ်အိၣ်စဲၢ်လီၤသြုးလီၤပျ့ၤလၢအကစၢ်အစီၢ်နီၤခိၣ်လီၤ.တုၤနုၤတစုယ့ၣ်ၡူးစံးဆၢတၢ်,ဒီးစံးဘၣ်အီၤ,နီၢ်ဧၢ,နနာ်တၢ်ဒိၣ်မးလီၤ.မ်တၢ်ကဲထီၣ်လၢနဂီၢ်ဖဲနသးတက့ၢ်.ဒီးအဖိမုၣ်န့ၣ်ဘျါက့ၤဝဲတစုဃီဖဲန့ၣ်လီၤ.

ပမ့ၢ်ကွၢ်လၢလံာ်စီဆှံတတီၤအံၤဒုးထံၣ်ပှၤလၢတၢ်နာ်နီၢ်နီၢ်လၢခရံာ်ပူၤန့ၣ်သိၣ်လိပှၤလၢပကဘၣ်အိၣ်မူတၢ်အိၣ်မူဒ်လဲၣ်န့ၣ်လီၤ.ပှၤကနၤဧၣ်ပိာ်မုၣ်တဂၤအံၤဒုးထံၣ်ပှၤလၢတၢ်နာ်လၢကစၢ်ယ့ၣ်ၡူးခရံာ်အပူၤန့ၣ်ပိာ်ထွဲထီၣ်အခံဒီးတၢ်မၤဖးဒိၣ်န့ၣ်လီၤ.ပိာ်မုၣ်အံၤသ့ၣ်ညါဝဲယ့ၣ်ၡူးခရံာ်အဂ့ၢ်လီၤတံၢ်လီၤဆဲးအဃိ,ကိးဝဲဒၣ် ယ့ၣ်ၡူးလၢ”စီၤဒၤဝံးအဖိခွါကစၢ်ဧၢ”လီၤ.တၢ်နာ်လၢယ့ၣ်ၡူးခရံာ်အိၣ်ဒီးအစိကမီၤန့ၣ်ပနာ်စ့ၢ်ကီးလၢတၢ် လၢအတဲဘၣ်ပှၤတဖၣ်န့ၣ်ပဒိကနၣ်အီၤလီၤ.ပှၤခရံာ်ဖိအိၣ်ဝဲဒၣ်အါဒ်အါဂၤလၢအနာ်ဝဲလၢယ့ၣ်ၡူးခရံာ်အိၣ်ဒီးအစိကမီၤလၢတၢ်ခဲလၢာ်အဖီခိၣ်လီၤ.သနာ်က့ဒီးပတၢ်နာ်တလီၣ်ဖျါထီၣ်အသၣ်နီတမံၤဘၣ်လီၤ. ယ့ၣ်ၡူးစံးဝဲဒၣ်,သုမ့ၢ်အဲၣ်ယၤဒီးတိၢ်န့ၢ်ယတၢ်မၤလိာ်တဖၣ်တက့ၢ်.ယိၤဟၣ်14:15.

ကနၤဧၣ်ပိာ်မုၣ်တဂၤအံၤသ့ၣ်ညါဝဲဒၣ်လၢကနၤဧၣ်အပူၤန့ၣ်ကစၢ်တအိၣ်ဘၣ်နီတဂၤဘၣ်.ထဲဒၣ်လၢယ့ၣ်ၡူးခရံာ်အပူၤအိၣ်ဒီးတၢ်စိတၢ်ကမီၤအလၢအပှဲၤလီၤ.လၢတၢ်နာ်ဒ်အံၤအဃိဟ့ၣ်အီၤတၢ်ဃ့ကညး,ဒီးတၢ်ဆီၣ်လီၤသးလီၤ.တပျဲဝဲဒၣ်လၢယ့ၣ်ၡူးခရံာ်ကလဲၤပူၤကွံာ်အီၤဘၣ်လီၤ.နာ်ဝဲဒၣ်လၢယ့ၣ်ၡူးမ့ၢ်တမၤဘျါက့ၤယဖိ မုၣ်ဘၣ်ဒီးတၢ်လၢကမၤဘျါက့ၤယဖိမုၣ်တအိၣ်ဘၣ်နီတမံၤဘၣ်.

တဘျီဘျီပကလဲၤခီဖျိဘၣ်တၢ်အိၣ်မူလၢပဘၣ်ပာ်ဂံၢ်ပာ်ဘါပှၤအဂုာ်အဂၤဒီးဆၢမုၢ်လၢ်တၢ်လၢအအိၣ်သ ပှၢ်ကတၢၢ်လီၤ.ဖဲလၢပှၤတဂၤလၢပမုၢ်တၢ်လၢအအိၣ်န့ၣ်မ့ၢ်မၤယံာ်မၤနီၢ်အသးထဲလဲၣ်ဘၣ်ဆၣ်မ့ၢ်လၢပတၢ်မုၢ်လၢ်အိၣ်လၢအဖီခိၣ်အဃိ,ပဝံသးစူၤအီၤ,ပအိၣ်ခိးအီၤဒီးဆီၣ်လီၤသးသပှၢ်ပှၢ်လီၤ.ဘၣ်ဆၣ်ပှၤတဂၤလၢပတၢ်မုၢ်လၢ်လၢအဖီခိၣ်အိၣ်ဒၣ်ထဲတဆံးတက့ၢ်န့ၣ်ပကအိၣ်ခိးအီၤလၢတၢ်ဝံသးစူၤအပူၤတကဲဘၣ် လီၤ.ခီဖျိလၢအဝဲဒၣ်မ့ၢ်တအိၣ်ဘၣ်ဆၣ်ပနာ်န့ၢ်လီၤပသးလၢပမူသ့,လဲၤခီဖျိသ့အဃိလီၤ.

တၢ်နာ်လၢခရံာ်အပူၤန့ၣ်ဟ့ၣ်ပှၤ,တၢ်ဝံသးစူၤ,တၢ်ဆီၣ်လီၤသး,တၢ်မၤဂ့ၤတၢ်,တၢ်ကီၤသူၣ်ကီၤသးဒီးတၢ်အဂုာ်အမၤအါမံၤန့ၣ်လီၤ.ပတၢ်နာ်ယ့ၣ်ၡူးန့ၣ်အိၣ်ဖျါထီၣ်ဝဲလၢတနံၤဘၣ်တနံၤအတၢ်အိၣ်မူပူၤန့ၣ်လီၤ.

တၢ်ထုကဖၣ် - ပၢ်ကစၢ်ယွၤဧၢ,ယစံးဘျုးနၤလၢနသိၣ်ယၤဒ်သိးယတၢ်နာ်ကဖျါထီၣ်ဝဲလၢယတၢ်အိၣ်မူတနံၤဘၣ်တနံၤအ ပူၤအဃိလီၤ.အါဘျီယစံးလၢယနာ်နၤလီၤ,ဘၣ်ဆၣ်ယတၢ်နာ်အသၣ်သ့ၣ်တဖၣ်တဖျါဝဲဒၣ်ဘၣ်လီၤ.ပျၢ်ဘၣ်ယတၢ်ကမၣ်ဒီးမၤစၢၤယၤဒ်သိးယကဒိၣ်ထီၣ်အါထီၣ်လၢတၢ်ဟ့ၣ်လီၤသးလၢနစုပူၤတက့ၢ်.မၤစၢၤယၤဒ်သိးလယကအါထီၣ်လၢတၢ်ဆီၣ်လီၤသးတက့ၢ်.လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်… အၤမ့ၤ