တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ကူၣ်သ့ဒံးဂုၢ်,တကူၣ်ဘၣ်တၢ်အၢဒံးထိၣ်လွံၢ်

မးသဲ 10:16

ကွၢ်ကွၢ်,ယမၢလီၤသုဒ်သိတဖၣ်လၢထွံၣ်မံၤအကျါအသိးန့ၣ်လီၤ.မၤသးဒ်န့ၣ်ဒီးကဲထီၣ်ပှၤကူၣ်တၢ်သ့ဒ်ဂုၢ်အသိး,ဒီးတကူၣ်ဘၣ်တၢ်အၢဒ်ထိၣ်လွံၢ်အသိးတက့ၢ်. တၢ်လၢဂုၢ်န့ၣ်ပှၤအါဒံအါဂၤပျံၤဘၣ်ဝဲလီၤ.ဂုၢ်န့ၣ်တၢ်ပာ်အီၤဒ်အမ့ၢ်တၢ်ကူၣ်သ့အပနီၣ်လီၤ.ပမ့ၢ်ကွၢ်လၢပှၤကီၢ်မုၢ်ထီၣ်ဖိသ့ၣ်တဖၣ်န့ၣ်သူဝဲတၢ်ကတိၤဂုၢ်အံၤဒီးဒိလီၤဝဲလၢတၢ်ကူၣ်ဘၣ်ကူၣ်သ့အပနီၣ်လီၤ.လၢကီၢ်အဲၣ်ကူပတူးအတၢ်လုၢ်ဟံၣ်တဖၣ်စ့ၢ်ကီးပာ်လီၤဝဲဂုၢ်အဂီၤခံဘိဒီးပှၤအိၣ်ဝဲဒၣ်တနီၤစ့ၢ်ကီးလၢအဘါဝဲဂုၢ် န့ၣ်အိၣ်ဝဲလီၤ.ပလံာ်စီဆှံအပူၤလၢလံာ်တၢမိၤဂှ့အဆၢဒိၣ်သၢအပူၤန့ၣ်ဒုးနဲၣ်စ့ၢ်ကီးပှၤလၢဂုၢ်မ့ၢ်ဆၣ်ဖိကီၢ်ဖိလၢကူၣ်တၢ်သ့ဒိၣ်န့ၢ်ဆၣ်ဖိကီၢ်ဖိအဂၤတက့ၢ်လီၤ.လၢလံာ်စီဆှံအပူၤအါတီၤပာ်ဖျါန့ၢ်ပှၤလၢဂုၢ်မ့ၢ်တၢ်ကူၣ်သ့လၢအအၢသီတကလုာ်လီၤ.ဘၣ်ဆၣ်လၢဂုၢ်အတၢ်ကူၣ်သ့လၢအအၢအသီအပူၤန့ၣ်ပမၤလိန့ၢ်တၢ်သ့စ့ၢ်ကီးဝဲလီၤ.

မ့မ့ၢ်ထိၣ်လွံၢ်န့ၣ်,တဖျါလၢအကူၣ်တၢ်သ့ဘၣ်.သနာ်က့ဒီးတၢ်ကူၣ်အၢကူၣ်သီတအိၣ်ဘၣ်လၢအပူၤဘၣ်. လၢထိၣ်လွံၢ်အပူၤန့ၣ်အိၣ်ဝဲထဲတၢ်သူၣ်ကဆှဲသးကဆှီဒီးတၢ်သရူးကမၣ်တအိၣ်ဘၣ်လၢအပူၤဘၣ်,တၢ်မၤဘၣ်ဒိဘၣ်ထံးပှၤဂုာ်ဂၤတအိၣ်ဘၣ်လီၤ. လၢတၢ်ကတိၤအဒိအတဲာ်တတီၤအံၤကစၢ်ယ့ၣ်ၡူးအဲၣ်ဒိးသိၣ်လိပှၤဒ်လဲၣ်,ကစၢ်ယ့ၣ်ၡူးအပျဲၢ်အဘီၣ်န့ၣ်ကဘၣ်မ့ၢ်ပှၤလၢအိၣ်ဒီးတၢ်ကူၣ်သ့ဒီးသးလၢအကဆှီန့ၣ်လီၤ.တနံၤဒီးတနံၤန့ၣ်သုဟးထီၣ်လၢသုဟံၣ်သုဃီ,သုတၢ်အိၣ်တၢ်ဆိးအလီၢ်ဒီးလဲၤဆူတၢ်မၤလီၢ်မ့ၢ်ဂ့ၤ,တၢ်မၤလိအလီၢ်မ့ၢ်ဂ့ၤ,ဆူကျဲကပိၤလိၤမ့ၢ်ဂ့ၤသုက ထံၣ်ဘၣ်တၢ်အကလုာ်ကလုာ်လီၤ.တဘျီဘျီပှၤကတဲတၢ်ဒီးသုလၢတၢ်ကတိၤလၢအဆူၣ်အကိၤ,တၢ်ကတိၤဘၣ်အၢဘၣ်သီ,တၢ်ကတိၤလၢမၤဆါဘၣ်နသး,နကထံၣ်ဘၣ်စ့ၢ်ကီးပှၤလၢအိၣ်ဒီးအလုၢ်လၢ်သကဲးပဝး လၢအအၢအသီတဖၣ်လီၤ.ဖဲန့ၣ်အဆၢကတီၢ်ဆိကမိၣ်ထီၣ်နကဘၣ်ဆိကမိၣ်ထီၣ်ဒီးမၤပှဲၤနသးလၢယွၤအတၢ်ကူၣ်သ့ဒီးတၢ်စီတၢ်ဆှံန့ၣ်လီၤ. တၢ်လၢဂုၢ်ဒီးထိၣ်လွံၢ်ခံခါအံၤန့ၣ်မ့ၢ်တၢ်လၢအအဖျါထီဒုၣ်ထီဒါလိာ်သးလီၤ.ဖျါဝဲဒၣ်လၢဂုၢ်န့ၣ်မ့ၢ်တၢ်အၢ ဒီးထိၣ်လွံၢ်န့ၣ်မ့ၢ်တၢ်စီတၢ်ဆှံလီၤ.ဘၣ်ဆၣ်ဒီးကစၢ်ယ့ၣ်ၡူးသူဝဲတၢ်အဒိခံခါအံၤမ့ၢ်ဒ်သိးကသိၣ်လိပှၤလၢပကဘၣ်မၤဃူလိာ်ဖိးလိာ်တၢ်လီၤ.ပှၤသးပှၢ်လၢညါသိၣ်လိပှၤလၢ,ပအိၣ်လၢပှၤနါအကျါအဃိပဘၣ်နါန့ၣ်တမ့ၢ်ဘၣ်.

ကိးနံၤဒဲးဒ်ကစၢ်ယ့ၣ်ၡူးစံးတ့ၢ်ဝဲအသိး,ယမၢလီၤသုဒ်သိတဖၣ်လၢထွံၣ်မံၤအကျါလီၤ.တနံၤဒီးတနံၤန့ၣ်ပ ဘၣ်အိၣ်မူ,ပဘၣ်လဲၤတၢ်လၢထွံၣ်မံၤသ့ၣ်တဖၣ်အကျါလီၤ.မ်ပအိၣ်ဒီးတၢ်ကူၣ်သ့,လၢကမၤမုာ်ထီၣ်ပှၤလၢအိၣ်ဒီးသူၣ်အၢသးသီတဖၣ်တက့ၢ်.တၢ်ကူၣ်သ့န့ၣ်အိၣ်ဝဲခံကလုာ်လီၤ.တၢ်ကူၣ်သ့လၢထးဒီးတၢ်ကူၣ်သ့ လၢလာ်လီၤ.တၢ်ကူၣ်ဘၣ်ကူၣ်သ့လၢအဟဲလၢဟီၣ်ခိၣ်န့ၣ်မ့ၢ်တၢ်သးဆဲးအဲး,တၢ်ဂ့ၢ်လိာ်ဘှီလိာ်,တၢ်ပာ် သးကဖၢလၢ,တၢ်ကတိၤကဘျံးကဘျၣ်တဖၣ်လီၤ.မ့မ့ၢ်တၢ်ကူၣ်သ့လၢထးန့ၣ်မ့ၢ်တၢ်စီတၢ်ဆှံ,တၢ်မုာ်တၢ်ဖိး,တၢ်သူၣ်စူသးစူၤ,တကွၢ်မဲာ်ဘၣ်တၢ်ဘၣ်,တၢ်လီတၢ်ဝ့ၤတအိၣ်ဘၣ်လၢအပူၤဘၣ်လီၤ.ယၤကိာ် 3:13-18. 

ကတိၤဒိ 14:15 ပှၤလၢအတမၤလိဘၣ်တၢ်ဘၣ်န့ၣ်နာ်တၢ်ကတိၤကိးထံၣ်ဒဲးလီၤ.မ့မ့ၢ်ပှၤအကူၣ်တၢ်ဘၣ်န့ၣ်ကွၢ်ဆိကမိၣ်အထွဲတၢ်လီၤ.

တၢ်ထုကဖၣ်- 

ပၢ်ကစၢ်ယွၤဧၢ,ယစံးဘျုးနၤလၢနပာ်လီၤယၤလၢဟီၣ်ခိၣ်အံၤဒ်သိဖိလၢအအိၣ်လၢထွံၣ်မံၤအကျါအသိးန့ၣ်လီၤ.သိၣ်လိယၤဒ်သိးယကအိၣ်ဒီးတၢ်ကူၣ်သ့ဒ်ဂုၢ်အသိးဒီးတကူၣ်ဘၣ်တၢ်အၢဒ်ထိၣ်လွံၢ်အသိးန့ၣ်တက့ၢ်. လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်… အၤမ့ၤ