တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

နီၢ်ဂံၢ်လွံၢ်ဆံ 40

မၤတၢ် 1 : 2 

ဒီးအဝဲဒၣ်ဒုးနဲၣ်အသးလၢအီၤလၢအမူဒံးလၢအဒိးတၢ်အလီၢ်ခံလၢတၢ်အုၣ်အသးအါမံၤလၢပသးဒ့ဒီတသ့ဘၣ်, ဒီးအိၣ်ဖျါထီၣ်လၢအီၤအနံၤလွံၢ်ဆံညါ,ဒီံးကတိၤတၢ်ဘၣ်ဃးဒီးယွၤအဘီအမုၢ်လီၤ.

နီၢ်ဂံၢ်လွံၢ်ဆံလၢလံာ်စီဆှံပူၤန့ၣ်ဘၣ်တၢ်ယၢၤထီၣ်အီၤအိၣ်ဝဲ 146 ဘျီလီၤ.ပကသ့ၣ်ညါဘၣ်ပဝဲအဘူးကတၢၢ်ဒ်အမ့ၢ်,စီၤနိအးအဂ့ၢ်,အံၣ်စရ့လးအတၢ်လဲၤလၢပှၢ်မုၢ်ကနၢ,စီၤယိၤနါဒီးနံၤနဝ့ဖိ,စီၤကၤလယါတၤတၢ်ဒီးပှၤအံၣ်စရ့လးဖိအဂ့ၢ်,ကစၢ်ယ့ၣ်ၡူးဒိးဘၣ်တၢ်လ့ပစီဖဲအဒုၣ်တၢ်အီၣ်အသီလွံၢ်ဆံအကတီၢ်,ဒီးတၢ်ဂ့ၢ်အဂၤအိၣ်ဝဲအါမးလၢအပာ်ဖျါထီၣ်ဝဲနီၢ်ဂံၢ်လွံၢ်ဆံန့ၣ်လီၤ.နီၢ်ဂံၢ်လွံၢ်ဆံမ့ၢ်တၢ်လၢအဒုးနဲၣ်ဖျါထီၣ်ဘၣ်ဃးတၢ်မၤကွၢ်,တၢ်လ့ပစီ,တၢ်တၤတၢ်,ဒီးတၢ်ကတဲာ်ကတီၤသး,တၢ်မၤလီၤတံၢ်ပတၢ်မ့ၢ်တၢ်ဒ်လဲၣ်အဂ့ၢ်န့ၣ်လီၤ.

ပကစၢ်ယ့ၣ်ၡူးဂဲၤဆၢထၢၣ်က့ၤဝံၤအလီၢ်ခံလီၣ်ဖျါထီၣ်အသးလၢအပျဲၢ်အဘီၣ်သ့ၣ်တဖၣ်အမဲာ်ညါဒီးစံၣ်တဲၤတဲလီၤတၢ်ဒီးမၤဂၢၢ်မၤကျၢၤထီၣ်က့ၤပှၤစူၢ်က့ၤနာ်က့ၤတၢ်ဖိတဖၣ်အတၢ်အိၣ်မူန့ၣ်လီၤ.ပှၤတနီၤနီၤကလဲၤခီဖျိဘၣ်လံတၢ်အိၣ်မူအနံၣ်လွံၢ်ဆံဒီးအဘျဲၣ်လံ,တနီၤနီၤကအိၣ်ဒံးဝဲလၢအနံၣ်လွံၢ်ဆံဒီးအဖီလာ်လီၤ.တၢ်အနီၢ်နီၢ်လၢပကဘၣ်ဆိကမိၣ်အီၤဖဲအံၤန့ၣ်,ပမ့ၢ်လဲၤခီဖျိတ့ၢ်လံအနံၣ်လွံၢ်ဆံဘျဲၣ်လံဒီးမ့ၢ်ပအိၣ်ဘၣ်လၢတၢ်မၤနၢၤနီၢ်နီၢ်အပူၤလံဧါ,ပမ့ၢ်တတုၤဃီၤဆူအနံၣ်လွံၢ်ဆံဒံးဘၣ်ဒီးတၢ်လၢပကဘၣ်သံကွၢ်လီၤက့ၤပသးဖဲအံၤန့ၣ်,မ့ၢ်ပအိၣ်ကတဲာ်ကတီၤပသးလီၤတံၢ်လီၤဆဲးလၢတၢ်ဃုထံၣ်န့ၢ်က့ၤပတၢ်မ့ၢ်တၢ်လံဧါ,

ကစၢ်ယ့ၣ်ၡူးအပျဲၢ်အဘီၣ်သ့ၣ်တဖၣ်လဲၤခီဖျိတ့ၢ်တၢ်အိၣ်မူလၢတၢ်မုၢ်လၢ်လၢာ်ကွံာ်ဝဲခဲလၢာ်လၢပကစၢ်ယ့ၣ်ၡူးခရံာ်ဘၣ်တၢ်ဖီၣ်အီၤဒီးတၢ်ပျၤထီအီၤအဃိန့ၣ်လီၤ.ဘၣ်ဆၣ်ခရံာ်အတၢ်ဂဲၤဆၢထၢၣ်က့ၤမ့ၢ်တၢ်လၢအဟ့ၣ်က့ၤအဝဲသ့ၣ်တၢ်မူအသီဒီးလၢတၢ်အသီလွံၢ်ဆံတချုးဖဲယ့ၣ်ၡူးက့ၤထီၣ်ဆူမူခိၣ်ဒံးဘၣ်န့ၣ်အဝဲဒၣ်မၤလီၤတံၢ်က့ၤအပျဲၢ်အဘီၣ်သ့ၣ်တဖၣ်အတၢ်မ့ၢ်တၢ်ဒ်လဲၣ်,ဒီးယ့ၣ်ၡူးပာ်လီၤတဲာ်တ့ၢ်အဝဲသ့ၣ်န့ၣ်လီၤ.မ့ၢ်လၢအပျဲၢ်အဘီၣ်သ့ၣ်တဖၣ်သ့ၣ်ညါလီၤတံၢ်အတၢ်မ့ၢ်တၢ်အဃိ,ဒ်ကစၢ်ယ့ၣ်ၡူးစံးတ့ၢ်ဝဲအသိး,တၢ်မၤလၢယမၤန့ၣ်သုကမၤစ့ၢ်ကီးဒီးကမၤဒိၣ်န့ၢ်အါန့ၢ်ယၤတက့ၢ်လီၤ.

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. … အၤမ့ၤ