တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

အိၣ်ဘှံးလၢယွၤအပူၤ

မးသဲ 11:28 ပှၤလၢတၢ်ဘှံးအသး,ဒီးဝံတၢ်ယိးတၢ်ဃၢခဲလၢာ်သ့ၣ်သုဧၢ,ဟဲဆူယအိၣ်တက့ၢ်.ဒီံးယကဒုးအိၣ်ဘှံးသုလီၤ

ဘၣ်သ့ၣ်သ့ၣ်ဖဲသုဖးတၢ်ဂ့ၢ်ခိၣ်တီအံၤတဘျီဃီသုကဆိကမိၣ်ဘၣ်ဖုးလၢတၢ်အိၣ်ဘှံးလၢယွၤအပူၤန့ၣ်မ့ၢ်တၢ်ပာ်လီၤတဲာ်တ့ၢ်ကွံာ်နီၢ်ခိအတၢ်အိၣ်မူဒီးအိၣ်ဘှံးအိၣ်သါလီၤစိၤလၢယွၤအပူၤန့ၣ်လီၤ.တၢ်အိၣ်ဘှံးလၢ ယွၤအပူၤတခါအံၤန့ၣ်တမ့ၢ်တၢ်ဒံးန့ၣ်ဘၣ်.တၢ်မၤလိာ်အဘီတဆံအကျါလွံၢ်ထံၣ်တထံၣ်သိၣ်လိပှၤလၢပက”သ့ၣ်နီၣ်ထီၣ်မုၢ်အိၣ်ဘှံးအနံၤလၢနကပာ်စီဆှံအီၤအဂီၢ်တက့ၢ်.”သ့ၣ်နီၣ်ထီၣ်လၢနကပာ်မုၢ်နံၤတနံၤလၢနကအိၣ်ဘှံးဒီးဟံးန့ၢ်တၢ်ဂံၢ်တၢ်ဘါ,မၤဆှံထီၣ်တၢ်ဆိကမိၣ်ဆိကမး,မၤကပီၤထီၣ်က့ၤပသးအဂီၢ်န့ၣ်တက့ၢ်.မုၢ်နံၤတနံၤအံၤကမ့ၢ်မုၢ်နံၤဖဲလဲၣ်တနံၤလဲၣ်န့ၣ်အလီၢ်တအိၣ်လၢပကဘၣ်ကတိၤဂ့ၢ်လိာ်အီၤဘၣ်.ထဲဒၣ်ပကဘၣ်သ့ၣ်နီၣ်ထီၣ်လၢပကဘၣ်သ့ဟံးန့ၢ်တၢ်အိၣ်ဘှံးလၢယွၤအပူၤန့ၣ်လီၤ.ပှၤလၢအအိၣ်ဘၣ်လၢထံကီၢ်လဲၤထီၣ်လဲၤထီသ့ၣ်တဖၣ်အပူၤန့ၣ်ကထံၣ်ဘၣ်ဝဲလၢတၢ်မၤလီၢ်တဖၣ်အိၣ်ဝဲအါမးလၢအမၤတၢ်တနွံနွံသီ ပှဲၤပှဲၤဒီးတသီန့ၣ်24နၣ်ရံၣ်လီၤ.ဘၣ်ဆၣ်တၢ်မၤလီၢ်သ့ၣ်တဖၣ်အံၤတၢ်အိၣ်ဘှံးအိၣ်သါတအိၣ်ဘၣ်.

5 မိၤဂှ့ 25:2,3 စံးဝဲဒၣ်,ဟီၣ်ခိၣ်ဘၣ်အိၣ်ဘှံးအတၢ်အိၣ်ဘှံးလၢယွၤအဂီၢ်လီၤ.ဃုနံၣ်န့ၣ်နကဖှံတၢ်လၢ နစံာ်ပူၤ,ဒီးဃုနံၣ်န့ၣ်နကပဲာ်ဃိကဆှီထီၣ်ဘၣ်နစပံးအလီၢ်,ဒီးထၢဖှိၣ်အသၣ်လီၤ.မ့မ့ၢ်နွံနံၣ်တနံၣ်န့ၣ်ကကဲထီၣ်တၢ်အိၣ်ဘှံးစီဆှံအတၢ်အိၣ်ဘှံးလၢဟီၣ်ခိၣ်အဂီၢ်,တၢ်အိာ်ဘှံးလၢယွၤအဂီၢ်လီၤ. ဟီၣ်ခိၣ်လၢယွၤတ့လီၤဝဲန့ၣ်,ကစၢ်ယွၤမ့ၢ်ထံၣ်ဝဲလၢအလိၣ်ဘၣ်တၢ်အိၣ်ဘှံးဒီးပှၤကညီလၢအမ့ၢ်ယွၤအစုတၢ်ဘၣ်တ့လၢအလုၢ်ဒိၣ်ပှ့ၤဒိၣ်န့ၣ်တလိၣ်ဘၣ်တၢ်အိၣ်ဘှံးဘၣ်ဧါ.တၢ်မၤလိာ်စံးဘၣ်ပှၤသ့ၣ်နီၣ်ထီၣ်မုၢ်အိၣ်ဘှံးနံၤလၢနကပာ်စီဆှံအီၤအဂီၢ်တက့ၢ်.တၢ်သ့ၣ်နီၣ်ထီၣ်မုၢ်အိၣ်ဘှံးအနံၤန့ၣ်မ့ၢ်ဝဲ,သ့ၣ်နီၣ်ထီၣ်မုၢ်နံၤတနံၤလၢနကအိၣ်ဘှံးအီၤအဂီၢ်တက့ၢ်.ပမ့ၢ်တဲလိၤလိၤန့ၣ်,သးပ့ၤနီၣ်အိၣ်ဘှံးတဂ့ၤ.ပှၤကိးဂၤဒဲးလိၣ်ဘၣ်တၢ်အိၣ်ဘှံးလီၤ.ဘၣ်ဆၣ်ပှၤကိးဂၤတသ့ၣ်ညါဝဲလၢကဘၣ်အိၣ်ဘှံးဒ်လဲၣ်န့ၣ်ဘၣ်.ပှၤတနီၤနီၤကဆိမိၣ်ဝဲလၢတၢ်ပာ်စီဆှံမုၢ်အိၣ်ဘှံးအနံၤန့ၣ်မ့ၢ်တၢ်ဟဲထီၣ်ဘူၣ်သကိးဘါသကိးအဂီၢ်ဧိၤလီၤ.မ့ၢ်ဝဲလီၤ.ဘၣ်ဆၣ်အါန့ၣ်အန့ၣ်မ့ၢ်ဝဲတၢ်ရ့လိာ်သးဒီးယွၤ,တၢ်အိၣ်ဘှံး,တၢ်ထိၣ်ကဆှၣ်လီၤသး,တၢ်မၤဆှံထီၣ်သး (rest, relax, refresh) လီၤ.

တၢ်အိၣ်ဘှံးလၢယွၤအပူၤန့ၣ်မ့ၢ်တၢ်လၢအဟ့ၣ်ပှၤတၢ်ဂံၢ်တၢ်ဘါလၢသးဒီးလၢနီၢ်ခိအဂီၢ်ခံခါလၢာ်လီၤ.ကစၢ်ယွၤသိၣ်လိအပှၤဂီၢ်မုၢ်လၢကဘၣ်သ့ဒုးအိၣ်ဘှံးစ့ၢ်ကီးဟီၣ်ခိၣ်ဒံးသိးကသ့ဟ့ၣ်ထီၣ်တၢ်ဂံၢ်တၢ်ဘါလၢကဟ့ၣ်ထီၣ်ဟီၣ်ခိၣ်ညၣ်ထ့ၣ်ဆူညါအဂီၢ်ကဒီးန့ၣ်လီၤ.ဟီၣ်ခိၣ်မးမ့ၢ်လိၣ်ဘၣ်တၢ်အိၣ်ဘှံးန့ၣ်ပှၤကညီဒုပတဲအလီၢ်တအိၣ်လၢၤဘၣ်.တၢ်အိၣ်ဘှံးလၢယွၤအပူၤန့ၣ်တမ့ၢ်ထဲအိၣ်ဘှံးနံၤတနံၤဧိၤဘၣ်,ဒီးတမ့ၢ်လၢပက ဘၣ်ဟံးန့ၢ်တနံၤပှဲၤပှဲၤဘၣ်.လၢတနံၤအတီၢ်ပူၤပဟံးန့ၢ်တစိၢ်ဖိသ့ဝဲလီၤ. ပကဟံးန့ၢ်တၢ်အိၣ်ဘှံးဒ်လဲၣ်,ပဟံးန့ၢ်အီၤသ့လၢတၢ်ထိၣ်ကဆှၣ်လီၤပနီၢ်ခိထူၣ်ပျၢ်,တၢ်ဆ့ၣ်နီၤ,မံနီၤ,ညိၣ်လဲာ်ထီၣ်သး,ဒီးဆိကမိၣ်ထီၣ်ယွၤအဘျုးအဖှိၣ်လၢအဘၣ်တ့ၢ်လံနၤတဖၣ်ဒီးသးခုလၢအပူၤတက့ၢ်.တၢ်လၢမုၢ်တနံၤအံၤယွၤတ့ဝဲလီၤ,ပကသူၣ်ဖှံသးညီဒီးသူၣ်ခုသးခုလၢအပူၤလီၤ.စံးထီၣ်ပတြၢၤ 118:24. ကစၢ်ယ့ၣ်ၡူးအဲၣ်ဒိးဝဲလၢနကဘၣ်အိၣ်ဘှံးအဃိအဝဲဒၣ်ကွဲမုာ်နၤထီဘိလီၤ.

တၢ်ထုကဖၣ်- ပၢ်ကစၢ်ယွၤဧၢ,ယစံးဘျုးနၤလၢနသိၣ်လိယၤလၢယကဘၣ်သ့အိၣ်ဘှံးအဃိလီၤ.ဟီၣ်ခိၣ်အတၢ်ကိၢ်တၢ်ဂီၤဒီးတၢ်ဖံးတၢ်မၤတဖၣ်အါဝဲလၢယဂီၢ်ဒီးယသးပ့ၤနီၣ်ဟံးန့ၢ်တၢ်အိၣ်ဘှံးလၢနပူၤန့ၣ်လီၤ.ဝံသးစူၤပျၢ်ဘၣ်ယတၢ်ကမၣ်ဒီးမၤစၢၤယၤဒ်သိးဆူညါယကဟံးန့ၢ်တၢ်အိၣ်ဘှံးလၢနပူၤအါထီၣ်အဂီၢ်န့ၣ်တက့ၢ်. လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်… အၤမ့ၤ