တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ကစၢ်ယွၤအဲၣ်နၤထဲလဲၣ်န့ၣ်နသ့ၣ်ညါအီၤကသ့ဝဲလၢ

လူၤကၣ် 7 : 41 စ့ကစၢ်တဂၤအစ့အိၣ်လၢပှၤခံဂၤအလိၤ, အဝဲတဂၤ, ဒန့ၤရံယဲၢ်ကယၤ, ဒီးအဝဲတဂၤ, ယဲၢ်ဆံလီၤ. ပှၤတဖၣ်န့ၣ်, စ့လၢအကလိးက့ၤအီၤတအိၣ်ဘၣ်ဒီး, ပျၢ်ကွံာ်ဝဲခံဂၤလၢာ်လီၤ. မ့မ့ၢ်ဒ်န့ၣ်ဒီး, အဝဲခံဂၤန့ၣ်, ကအဲၣ်အီၤဒိၣ်တက့ၢ်ဖဲလဲၣ်တဂၤလဲၣ်. စံးဘၣ်ယၤတက့ၢ်. ဒီးစီၤဂှံမိၣ်ကတိၤဆၢတၢ်ဒီး စံးဝဲဒၣ်, ယဆိကမိၣ်ပှၤလၢ အပျၢ်ကွံာ်အတၢ်လၢ အအါတက့ၢ်တဂၤလီၤ. ဒီးစံးဘၣ်အီၤ, နစံၣ်ညီၣ်တၢ်ဘၣ်လံ.

တဘျီဘျီပနၢ်ဟူပှၤတဲဝဲမ့ၢ်ဂ့ၤ, ပှၤကတိၤသကိးဝဲမ့ၢ်ဂ့ၤ, ဘၣ်ဃးတၢ်အဲၣ်ကစၢ်ယွၤအဂ့ၢ်လီၤ. ပှၤတနီၤနီၤ စံးဝဲပဒီပုၢ်ဝဲၢ်တဂၤန့ၣ်အဲၣ်ကစၢ်ယွၤဒိၣ်မး, ဒီးတဘျီဘျီပကနၢ်ဟူပှၤစံးဝဲ, ပဒီပုၢ်ဝဲၢ်တဂၤန့ၣ်တၢ်အဲၣ်ကစၢ် ယွၤတအိၣ်ဘၣ်. တၢ်အံၤမ့ၢ်ပှၤဆၢတဲာ်ဝဲလၢတၢ်ဂ့ၢ်မနုၤအဖီခိၣ်လဲၣ်. တဘျီဘျီယနီၢ်ကစၢ်ဒၣ်ယဲယတဲ ဘၣ်စ့ၢ်ကီးလၢ, ပဒီပုၢ်ဝဲၢ်တဂၤန့ၣ်အဲၣ်ကစၢ်ယွၤဒိၣ်မး, ဒီးတဘျီဘျီယပဲာ်ထံနီၤဖးဘၣ်စ့ၢ်ကီးပဒီပုၢ်ဝဲၢ် လၢ, အတၢ်အဲၣ်ကစၢ်ယွၤတအိၣ်အါအါဘၣ်.

တၢ်သ့ၣ်တဖၣ်အံၤမၤအသးလၢပကဲထီၣ်ပှၤစံၣ်ညီၣ်ဆၢတဲာ်တၢ်လၢပှၤအဂၤအဖီခိၣ်လီၤ.တၢ်အနီၢ်နီၢ်တခီန့ၣ်ပှၤအဲၣ်ကစၢ်ယွၤဒိၣ်,အဆံးန့ၣ်ပဆၢတဲာ်အလီၢ်တအိၣ်,ပသ့ၣ်ညါအီၤတသ့ဘၣ်.အါဘျီပဆၢတဲာ်တၢ်ဂ့ၢ်အံၤခီဖျိလၢပထံၣ်ပှၤတဂၤအံၤထီၣ်သရိာ်စိၤမိၤအါ,ဟ့ၣ်တၢ်မၤဘူၣ်အါ,သးဆူၣ်လၢတၢ်သးခုကစီၣ်,အဲၣ်ပှၤလၢအဘၣ်ကီဘၣ်ခဲ,တိစၢၤမၤစၢၤပှၤအဂၤ,ဟ့ၣ်လီၤသးလၢတၢ်သးခုကစီၣ်ပူၤလၢာ်လၢာ်ဆ့ဆ့လီၤ.လၢတၢ်ဂ့ၢ်ဒ်အံၤအဃိပတဲလၢပှၤဝဲန့ၣ်အဲၣ်ယွၤဒိၣ်မးလီၤ.နီၢ်နီၢ်န့ၣ်တမ့ၢ်တၢ်ဒ်န့ၣ်ဘၣ်.ပအဲၣ်ကစၢ်ယွၤအဃိကစၢ်ယွၤအဲၣ်ဆၢက့ၤပှၤန့ၣ်တမ့ၢ်ဘၣ်.တၢ်အကါဒိၣ်နီၢ်နီၢ်တခီန့ၣ်မ့ၢ်ဒၣ်လၢပကဘၣ်သ့ၣ်ညါယွၤအတၢ်အဲၣ်လၢပဖီခိၣ်ဆံးအါလဲၣ်န့ၣ်လီၤ.ပမ့ၢ်သ့ၣ်ညါယွၤအတၢ်အဲၣ်ဒီးသ့တူၢ်လိာ်အတၢ်အဲၣ်န့ၣ်မ့ၢ်တၢ်လၢတၢ်ပှဲၤလီၤ.ဒ်သိးကစၢ်ယွၤကအဲၣ်ပှၤအါ ထီၣ်အဂီၢ်ပမၤတသ့ဘၣ်.ပအဲၣ်ကစၢ်ယွၤအါထီၣ်အဃိအဝဲဒၣ်ကအဲၣ်ပှၤဒိၣ်ထီၣ်တသ့စ့ၢ်ကီးဘၣ်.ပကမၤအါထီၣ်ယွၤအတၢ်အဲၣ်လၢပဖီခိၣ်တသ့စ့ၢ်ကီးဘၣ်,ထဲဒၣ်ပတူၢ်လိာ်အတၢ်အဲၣ်လၢပဖီခိၣ်န့ၣ်ပကသးခု ဘၣ်လၢအတၢ်အဲၣ်အပူၤလီၤ.ဒ်ကစၢ်ယ့ၣ်ၡူးတဲတ့ၢ်တၢ်အဒိအတဲာ်အသိး,ပှၤတဂၤလၢအကမၢ်အိၣ်အါမးဒီးဘၣ်တၢ်ပျၢ်ကွံာ်အီၤန့ၣ်မ့ၢ်ပှၤတဂၤလၢကစၢ်ယွၤအဲၣ်အီၤဒိၣ်ကတၢၢ်လီၤ.ကစၢ်ယွၤအဲၣ်ပှၤထဲလဲၣ်န့ၣ်ပသ့ၣ်ညါအီၤသ့လၢပကမၢ်အိၣ်ထဲလဲၣ်န့ၣ်လီၤ.မ့ၢ်တၢ်အရ့ဒိၣ်ဝဲဒၣ်ဒိၣ်မးလၢပကဘၣ်သ့ၣ်ညါပကမၢ်အိၣ် လၢကစၢ်ယွၤအဖီခိၣ်ထဲလဲၣ်န့ၣ်လီၤ.ပှၤလၢအဒ့ၣ်ကမၢ်တအိၣ်ဘၣ်န့ၣ်အလီၢ်တအိၣ်လၢကစၢ်ယွၤကဘၣ်ပျၢ်ဖျဲးကွံာ်အီၤဘၣ်.ဒီးယွၤအတၢ်အဲၣ်လၢအဖီခိၣ်န့ၣ်မ့ၢ်တၢ်ဆံးစှၤစ့ၢ်ကီးလီၤ.

ကစၢ်ယ့ၣ်ၡူးစံးဝဲပှၤလၢအအိၣ်ဆူၣ်အိၣ်ချ့န့ၣ်တလိၣ်ဘၣ်ကသံၣ်သရၣ်ဘၣ်.မ့ၢ်ထဲဒၣ်ပှၤလၢအဘၣ်ဆူးဘၣ်ဆါတဖၣ်လီၤ.နကမၢ်အိၣ်ဆံးအါလဲၣ်ဒီးနကသ့ၣ်ညါယွၤအတၢ်အဲၣ်လၢနဖီခိၣ်အိၣ်ထဲလဲၣ်န့ၣ်လီၤ. အိၣ်ဆိးလၢယွၤအတၢ်အဲၣ်အပူၤထီဘိ

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. … အၤမ့ၤ