တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ကဆှီလံ

လံာ်မၤတၢ် 10 : 15

ဒီးတၢ်အကလုၢ်လီၤဘၣ်ကဒီးအီၤ,ပှဲၤထီၣ်ခံဘျီတဘျီ,တၢ်လၢယွၤမၤကဆှီန့ၣ်,သုတပာ်လၢတၢ်တစီတဆှံဘၣ်တဂ့ၤ.

ကစၢ်ယွၤအသးစီဆှံကတိၤတၢ်ဒီးစီၤပ့းတရူးဖဲလံာ်စီဆှံတတီၤအံၤအပူၤန့ၣ်တမ့ၢ်လၢအကတိၤတၢ်အီၣ်တၢ်အီအဂ့ၢ်အကျိၤဒီးတၢ်လၢပကဘၣ်ဂ့ၢ်လိာ်ဘှီလိာ်ပသးလၢတၢ်အီၣ်တၢ်အီအဃိဘၣ်.တၢ်အနီၢ်နီၢ်အဒုးထံၣ်ပှၤန့ၣ်ပကသ့ၣ်ညါလီၤပသးဒ်ပမ့ၢ်ယွၤအဖိလၢအပှ့ၤက့ၤပှၤလၢအသွံၣ်ဒီးပကဲထီၣ်ပှၤစီဆှံလံန့ၣ်လီၤ.ခရံာ်အသွံၣ်လၢအသ့စီကွံာ်ပှၤန့ၣ်ဘၣ်မနုၤအဃိလၢပကစံးဒံးလၢအတကဆှီဘၣ်လဲၣ်.အဝဲအံၤမ့ၢ်တၢ်ဂ့ၢ်လၢပကဘၣ်ဆိကမိၣ်သကိးအါထီၣ်န့ၣ်လီၤ.စီၤပ့းတရူးအတၢ်ထံၣ်တခါအံၤကစၢ်ယွၤဒုးထံၣ်အီၤလၢခရံာ်အသွံၣ်လၢအသ့စီဆှီ ကွံာ်ပှၤဟီၣ်ခိၣ်ဖိအတၢ်ဒဲးတူၢ်ဒဲးဘးန့ၣ်မ့ၢ်ဒၣ်လၢပှၤခဲလၢာ်အဂီၢ်လီၤ.

ပှၤကိးလီၤအသးလၢခရံာ်ဖိအါဒံအါဂၤတူၢ်ဘၣ်ဒံးဝဲလၢခရံာ်အသွံၣ်န့ၣ်သ့အီၤတစီလၢလၢပှဲၤပှဲၤဘၣ်န့ၣ်လီၤ.အဃိအါစုအါဘျီတူၢ်ဘၣ်ဝဲဒၣ်လၢအတၢ်အိၣ်မူတလၢတပှဲၤနီတဘျီဘၣ်,ဒီးတဒိးန့ၢ်ဘၣ်သးအတၢ်သူၣ်ခုသးခုဘၣ်လီၤ.ပမ့ၢ်တူၢ်ဘၣ်လၢပတၢ်အိၣ်မူန့ၣ်တစီဆှံလၢယွၤအမဲာ်ညါဘၣ်ဒီးမ့ၢ်ဒၣ်လၢပအိၣ်ဒံးလၢတၢ်ဒဲးဘးအပူၤလီၤ.ခီဖျိလၢပအိၣ်ဒံးလၢတၢ်ဒဲးဘးအပူၤအဃိပသးခုတသ့ဘၣ်ဒီးပသးဆၢမၤဒံးတၢ်ဒဲးဘးအါထီၣ်ဒိၣ်ထီၣ်လီၤ.တၢ်အဒိ,ပမၤကဆှဲကဆှီပသး,လုၢ်ထံလုၢ်နိမ့ၢ်ဝံၤန့ၣ်,ပသးတအိၣ်လၢပကမၤဘၣ်အၢဘၣ်သီပသးဒီးစံၣ်လီၤလၢကပံာ်ကျါလၢၤဘၣ်.တၢ်အိၣ်မူလၢသူၣ်လၢသးစ့ၢ်ကီးမ့ၢ်တၢ်ဒ်န့ၣ်အသိးလီၤ.ပမ့ၢ်သ့ၣ်လၢခရံာ်အသွံၣ်လၢအသ့စီပှၤမ့ၢ်တၢ်လၢတၢ်ပှဲၤဒီးပကအိၣ်မူတၢ်အိၣ်မူလၢအပှဲၤဒီးတၢ်သူၣ်ဖှံသးညီ,ဒီးသးလၢအဆၢမၤတၢ်အၢတၢ်သီတအိၣ်လၢၤဘၣ်လီၤ.

တၢ်လၢယွၤမၤကဆှီဝဲန့ၣ်ပတပာ်လၢအတကဆှီဒံးဘၣ်ဧါ

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. … အၤမ့ၤ