တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ယွၤအထံဖိကီၢ်ဖိ

လံာ်မၤတၢ် 22 : 27 ဒီးပှၤသုးဖိတကထိအခိၣ်ဟဲဃီၤဒီစံံးဘၣ်အီၤ,နမ့ၢ်ပှၤရိမ့ၤဖိဧါ,စံးဘၣ်ယၤတက့ၢ်.ဒီးစံးဝဲဒၣ်,မ့ၢ်ဝဲသၢၣ်,ဒီးပှၤသုးဖိတကထိအခိၣ်န့ၣ်ကတိၤဆၢဝဲ,ယဟ့ၣ်စ့လၢအအါဒီး,ယထီၣ်ဘးကီၢ်ဖိအကွီၢ်အံၤလီၤ.ဒီးစီၤပီလူးစံးဝဲဒၣ်,မ့မ့ၢ်ယဲဒၣ်အံၤယအိၣ်ဖျဲၣ်လၢပှၤကီၢ်ဖိအကွီၢ်လီၤ.

ကညီဖိလၢအလီၤမုၢ်ပြံပြါဒီးဟးအိၣ်ဟးဆိးဘၣ်လၢပှၤထံပှၤကီၢ်တဖၣ်တုၤမ့ၢ်အဝဲသ့ၣ်ကဲထီၣ်ဘၣ်ပှၤထံဖိကီၢ်ဖိန့ၣ်အသူၣ်ခုသးခုဝဲဒၣ်ဒိၣ်မးလီၤ.မ့ၢ်စဲဃဲၤလီၤ.အဂ့ၢ်ဒ်လဲၣ်ပဝဲဒၣ်ကညီဖိသ့ၣ်တဖၣ်ပတူၢ်ဘၣ်တၢ်မၤအၢမၤသီ,တၢ်ဆီၣ်ဘံးဆီၣ်ဘၢပှၤလၢကလုာ်ဒိၣ်စိတဖၣ်လၢအါနံၣ်အါအတီၢ်ပူၤတုၤလီၤလၢအခဲအံၤဒၣ်လဲာ်တကတၢၢ်ဒံးဘၣ်လီၤ.လၢတၢ်ဂ့ၢ်ဒ်အံၤအဃိတုၤမ့ၢ်ကညီဖိလၢဟးအိၣ်ဟးဆိးလၢပှၤထံပှၤကီၢ်လၢအဒိၣ်အထီတဖၣ်မ့ၢ်ကဲထီၣ်ဘၣ်ထံဖိကီၢ်ဖိဒီးအသူၣ်ခုသးခုဝဲဒိၣ်မးလီၤ.

စီၤပီလူးမ့ၢ်ပှၤယူဒၤဖိအိၣ်ဖျဲၣ်လၢတၢ်စူးလၢကံၤလံၤကံအပူၤဒီးမ့ၢ်ပှၤလၢကဲထီၣ်ဘၣ်ရိမ့ၤအထံဖိကီၢ်ဖိလၢအအိၣ်ဖျဲၣ်ထီၣ်အဆၢကတီၢ်န့ၣ်လီၤ.တၢ်လၢပှၤရိမ့ၤဖိန့ၣ်ဖဲအစိၤဆၢကတီၢ်န့ၣ်အထံဖိကီၢ်ဖိခဲလၢာ်အိၣ်ဒီးတၢ်သဘျ့ဒီးတကးဘၣ်အမဲာ်ညါအိၣ်ဒီးတၢ်ခွဲးတၢ်ယာ်လီၤဆီတဖၣ်ဒီးမ့ၢ်မၤတၢ်ကမၣ်ဒၣ်လဲာ်ပှၤစံၣ်ညီၣ်အီၤတပၢဘၣ်လီၤ.ထံကီၢ်လၢအအိၣ်ဒီးတၢ်ခွဲးတၢ်ယာ်,တၢ်စိတၢ်ကမီၤဒ်အံၤတဖၣ်,ပှၤအါဂၤကမိၣ်ကဲထီၣ်ဘၣ်အသးလၢအထံဖိကီၢ်ဖိလီၤ.သုးဖိတကထိအခိၣ်တဂၤဒ်သိးကကဲထီၣ်ဘၣ်ပှၤရိမ့ၤအထံဖိကီၢ်ဖိန့ၣ်ဘၣ်ဟ့ၣ်ဝဲဒၣ်စ့အါအါကလဲာ်လီၤ.

ဒီပုၢ်ဝဲၢ်လၢအစူၢ်က့ၤနာ်က့ၤခရံာ်သ့ၣ်ဧၢ,မ့ၢ်တၢ်သးခုလၢပဂီၢ်ဆံးဒိၣ်လဲၣ်,ပကကဲထီၣ်ဘၣ်ယွၤအထံဖိကီၢ်ဖိန့ၣ်တလိၣ်လၢပဘၣ်ဟ့ၣ်ကျိၣ်စ့မ့ၢ်ဂ့ၤ,ဂုာ်မၤတၢ်လၢပဂံၢ်ပဘါဆူၣ်ဆူၣ်ကလဲာ်မ့ၢ်ဂ့ၤအလီၢ်တအိၣ်ဘၣ်.ထဲဒၣ်အၢၣ်လီၤတူၢ်လိာ်လၢပသးပူၤလၢယ့ၣ်ၡူးခရံာ်မ့ၢ်ကစၢ်လၢအအုၣ်က့ၤခီၣ်က့ၤပှၤဒီးမ့ၢ်တၢ်လၢတၢ်ပှဲၤဒီးပကဲထီၣ်ဘၣ်ယွၤအထံဖိကီၢ်ဖိတဘျီဃီလီၤ.တၢ်ကပာ်ပနီၣ်ပှၤလၢယွၤအထံဖိကီၢ်ဖိန့ၣ်သ့ဒၣ်ထဲလၢယ့ၣ်ၡူးခရံာ်အသွံၣ်ဧိၤလီၤ.

တၢ်သးခုကစီၣ်လၢပကဘၣ်စိာ်အီၤလၢတနံၤဘၣ်တနံၤန့ၣ်,ပကဘၣ်ဒုးသ့ၣ်ညါပှၤကိးဂၤလၢအမ့ၢ်ယွၤအထံဖိကီၢ်ဖိလီၤ.တဲပှၤလၢနထံၣ်ဘၣ်အီၤလၢတနွံအံၤအတီၢ်ပူၤလၢ”နမ့ၢ်ယွၤအထံဖိကီၢ်ဖိ”,အဝဲဒၣ်မ့ၢ်တသ့ၣ်ညါလီၤတံၢ်တခီတဲဘၣ်အီၤလၢခရံာ်အတၢ်အဲၣ်လၢအဖီခိၣ်,ဒီးကသ့ၣ်ညါတူၢ်လိာ်ဝဲခရံာ်အတၢ်အုၣ်က့ၤခီၣ်က့ၤဒီးသးခုဘၣ်ဝဲလၢယွၤအထံဖိကီၢ်ဖိအတၢ်ခွဲးတၢ်ယာ်တဖၣ်အပူၤလီၤ.ပကဘၣ်သးခုသကိးလၢတၢ်ခွဲးတၢ်ယာ်ဒ်အံၤလီၤ.လၢတၢ်ဘူၣ်တၢ်ဘါအလုၢ်အလၢ်တဖၣ်အပူၤပကမၤန့ၢ်တၢ်ခွဲးတၢ်ယာ်လၢကကဲထီၣ်ဘၣ်ယွၤအထံဖိကီၢ်ဖိတသ့ဘၣ်.ထဲဒၣ်ပကစၢ်ယ့ၣ်ၡူးခရံာ်အမံၤအဃိလီၤ.

ဖံလံးပံၤ 3:20 အဂ့ၢ်ဒ်အံၤ, ပတၢ်ဝ့ၢ်ဖိအလီၢ်ဘၣ်ဃးဒီးမူခိၣ်, လၢအပူၤန့ၣ်ပကွၢ်လၢ်ပှၤ အုၣ်က့ၤခီၣ်က့ၤတၢ်,ကစၢ်ယ့ၣ်ၡူးခရံာ်အကျဲစ့ၢ်ကီးလီၤ.

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. … အၤမ့ၤ