တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

နာ်န့ၢ်အီၤကိးဆၢကတီၢ်ဒဲး

သန့ၤသုသးလၢယွၤလီၤစိၤလီထီတက့ၢ်.အဂ့ၢ်ဒ်အံၤ,လၢကစၢ်ယွၤအပူၤန့ၣ်လၢၢ်အထူအယိာ်အိၣ်ဝဲတ ဖျၢၣ်လီၤ.

ယအဲၣ်ဒိးတဲဘၣ်သုလၢယတၢ်လဲၤခီဖျိတမံၤလီၤ.ဘၣ်သ့ၣ်သ့ၣ်သုကလဲၤခီဖျိဘၣ်ဒံးသိးယၤစ့ၢ်ကီးကအိၣ်ဝဲတနီၤလီၤ.တနံၤန့ၣ်ယဘၣ်လဲၤတၢ်အိၣ်ဖှိၣ်လၢတၢ်လီၢ်တတီၤလၢယတလဲၤဘၣ်နီတဘျီဘၣ်လီၤ.ယကဘၣ်လဲၤနီၢ်သိလ့ၣ်ကအိၣ်ဝဲတနၣ်ရံၣ်အဘျဲၣ်လီၤ.မ့ၢ်လၢယလဲၤတဘၣ်အဃိယဘၣ်သူဝဲဒၣ်စဲးဒုးနဲၣ်ကျဲပကိးအီၤလၢ (GPS) လီၤ.ဒ်သိးယသုတဟးကမၣ်ကျဲတဂ့ၤအဂီၢ်န့ၣ်,ယဂုာ်ကျဲးစၢးဒိကနၣ်စဲးနဲၣ်ကျဲတဖျၢၣ်အံၤအတၢ်ဟံးစုနဲၣ်ကျဲယၤတုၤလီၤတီၤလီၤလီၤ.မ့ၢ်လၢစဲးတဖျၢၣ်အံၤဆှၢယၤအဃိယလဲၤတုၤဘၣ်တၢ်လီၢ်လၢယကဘၣ်အိၣ်ဖှိၣ်န့ၣ်ဂ့ၤဂ့ၤလီၤ.ဒ်န့ၣ်အသိးဖဲတၢ်အိၣ်ဖှိၣ်ဝံၤန့ၣ်ယဘၣ်ဟဲက့ၤကဒါက့ၤဒီးသူကဒီးစဲးနဲၣ်ကျဲတဖျၢၣ်အံၤန့ၣ်လီၤ.တၢ်ညီနုၢ်လၢအမၤအသးဒီးယၤန့ၣ်,ဖဲလၢယဟဲက့ၤကဒါက့ၤတကပၤန့ၣ်တုၤမ့ၢ်ယတုၤတၢ်လီၢ်လၢယကွၢ်နီၣ်ဘၣ်ဒီးသ့ၣ်ညါလီၤတံၢ်ကျဲဆူယဟံၣ်လံတဘျီဒီးစဲးနဲၣ်ကျဲတဖျၢၣ်အံၤမ့ၢ်ဒုးနဲၣ်ယၤကျဲလၢယကဘၣ်ပိာ်အီၤတဘိဘိဒီးယတကနၣ်အီၤဘၣ်.ယဃုထၢဒၣ်ကျဲလၢယပိာ်ညီနုၢ်ဒီးဘၣ်ယသးတဘိလၢယကတုၤဆူယဟံၣ်အဂီၢ်န့ၣ်လီၤ.တၢ်တနံၤအံၤယသးဒုးဆိကမိၣ်ထီၣ်ယၤ,ဖဲလၢယလဲၤတၢ်လီၢ်တဘၣ်အဆၢကတီၢ်ယဒိကနၣ်စဲးနဲၣ်ကျဲတဖျၢၣ်အံၤအကလုၢ်ဂ့ၤဂ့ၤလီၤ.ဘၣ်ဆၣ်တုၤမ့ၢ်ယသ့ၣ်ညါက့ၤကျဲတဘျီဒီးယတသးအိၣ်ဒိကနၣ်လၢၤကျဲလၢအဆှၢယၤန့ၣ်မ့ၢ်အဘၣ်မနုၤလဲၣ်.ယပိာ်ဒၣ်ကျဲယကသ့ၣ်ညါလၢအဂ့ၤဒီးအဘျၢတဘိန့ၣ်လီၤ.ပတၢ်အိၣ်မူလၢသူၣ်လၢသးစ့ၢ်ကီးအါဘျီမၤအသးဒ်န့ၣ်လီၤ.ပသန့ၤပသးလၢယွၤဖဲဒၣ်လၢပလဲၤတၢ်လၢပကစၢ်အဂံၢ်အဘါ,ပတၢ်သ့ၣ်ညါတသ့ဘၣ်အဆၢကတီၢ်န့ၣ်လီၤ.ဖဲလၢပဂံၢ်ပဘါဂ့ၤဒီးပတၢ်သ့ၣ်ညါအိၣ်အခါန့ၣ်ပတဒိကနၣ်ကစၢ်ယွၤအတၢ်ဟံးစုနဲၣ်ကျဲပှၤဘၣ်.

ကစၢ်ယွၤအကလုၢ်ကထါတတီၤအံၤစံးဘၣ်ပှၤလၢ,သန့ၤသုသးလၢယွၤလီၤစိၤလီၤထီတက့ၢ်.တမ့ၢ်လၢပကဘၣ်သန့ၤပသးလၢယွၤတဘျီတဘျီဖဲလၢပစုကတၢၢ်ခီၣ်ကတၢၢ်အခါဘၣ်န့ၣ်လီၤ.လၢယွၤအပူၤန့ၣ်လၢၢ်အထူအယိာ်အိၣ်ဝဲတဖျၢၣ်လီၤ.လၢၢ်အံၤမ့ၢ်ဝဲဒၣ်ယ့ၣ်ၡူးခရံာ်လီၤ."သန့ၤနသးလၢယွၤလၢနသးဒီဖျၢၣ်ညါတက့ၢ်,ဒီးသုတသန့ၤနသးလၢနတၢ်ကူၣ်တၢ်ဆးဒၣ်နဲတဂ့ၤ,သ့ၣ်ညါယွၤလၢနကျဲခဲလၢအပူၤတက့ၢ်ဒီးအဝဲဒၣ်ကမၤလိၤနကျဲလီၤ." ကတိၤဒိ3:5-6.

"ပှၤလၢအသန့ၤအသးလၢယွၤလၢအတၢ်သန့ၤအလီၢ်မ့ၢ်ယွၤန့ၣ်ဘၣ်ဆိၣ်ဂ့ၤဝဲလီၤ.ကမၤအသးဒ်သ့ၣ်သူၣ်အသးလၢထံနံၤ,လၢအစဲၤလီၤအဂံၢ်လၢထံကျိအနံၤ,,ဒီးတုၤတၢ်ကိၢ်ဟဲဝဲဒီး,တထံၣ်ဘၣ်ဝဲဘၣ်,အလၣ်အိၣ်သံကစဲာ်ဒီးနံၣ်လၢတၢ်တဟဲစူၤဘၣ်န့ၣ်တလီၤညွံးဘၣ်ဝဲဘၣ်,ဒီးသၣ်ထီၣ်တၤသၣ်န့ၣ်တတုာ်ဘၣ်ဝဲဘၣ်. ဝံယံးရမံယၤ 17:7-8".

တၢ်ထုကဖၣ်- ပၢ်ကစၢ်ယွၤဧၢ,ယစံးဘျုးနၤလၢနဆှၢယတၢ်အိၣ်မူထီဘိတဘိယူာ်ဃီလီၤ.ဝံသးစူၤပျၢ်ဘၣ်ယတၢ်ကမၣ် လၢယနာ်န့ၢ်နၤဖဲဒၣ်လၢယလီၤဘၣ်လၢတၢ်ကီတၢ်ခဲအပူၤအခါဒီးဖဲဒၣ်လၢယလဲၤတၢ်လၢယဂံၢ်ယဘါတသ့အခါန့ၣ်လီၤ.ယဃ့လၢနသးစီဆှံကမၤစၢၤယၤဒ်သိးဆူညါယသုတကဲထီၣ်ပှၤဒ်န့ၣ်အသိးလၢၤတဂ့ၤ. လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်. အၤမ့ၤ