တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

အါထီၣ်လၢတၢ်စံးဘျုး,စှၤလီၤလၢတၢ်ကဒူးကဒ့ၣ်

သးသယုၢ်တၢ် 3:23, အဘျုးအဖှိၣ်အသီအိၣ်ဝဲကိးဂီၤဒဲးလီၤ.နမၤတီနကလုၢ်လီၤတံၢ်လီၤဆဲးလီၤ. ကစၢ်ယွၤအဘျုးအဖှိၣ်လၢပဂီၢ်လၢ 2015 နံၣ်အပူၤန့ၣ်, တဒံးသိးဒီးအဘျုးအဖှိၣ်လၢပဂီၢ်လၢ 2016 နံၣ်အပူၤလၢပကလဲၤခီဖျိကဒီးအီၤန့ၣ်ဘၣ်. မ့ၢ်တၢ်အသီခဲလၢာ်ခဲဆ့လီၤ. ယွၤအဘျုးအဖှိၣ်ဒီး အတၢ်ကတဲာ်ကတီၤလၢပဂီၢ်န့ၣ်တမ့ၢ်တၢ်အလီၢ်လံၤနီတဘျီဘၣ်.

တၢ်အိၣ်ဖှိၣ်သရၣ် ှီဲလ ိဆတဲဲန စံးဝဲဒၣ်, တၢ်စံးဘျုးစံးထီၣ်ပတြၢၤန့ၣ်မ့ၢ်တၢ်လၢအမၤစှၤလီကွံာ် တၢ်ဒူးကဒ့ၣ်, သူၣ်အၢသးသီသ့ၣ်တဖၣ်လီၤ. အဝဲဒၣ်ဟ့ၣ်ဝဲတၢ်အဒိဒ်အံၤလီၤ. ပတၢ်အိၣ်မူန့ၣ်မၤအသးဒ်သိးဒီးထံခွးတဖျၢၣ်လၢအပှဲၤဒီးထံဘၣ်အၢဘၣ်သီသ့ၣ်တဖၣ်လီၤ.ဖဲလၢပမ့ၢ်လူလီၤထံကဆှီလၢပထံခွးဘၣ်အၢတဖျၢၣ်အပူၤထီဘိဒီးထံဘၣ်အၢသ့ၣ်တဖၣ်ကလီၤဂၢ်ကွံာ်ဝဲတစဲးဘၣ်တ စဲးဒီးလၢခံန့ၣ်ကအိၣ်တ့ၢ်က့ၤဝဲထဲထံအကဆှီန့ၣ်လီၤ.ပမ့ၢ်လူလီၤထံကဆှီလၢအမ့ၢ်တၢ်စံးထီၣ်ပတြၢၤယွၤအဘျုးအဖှိၣ်,အတၢ်ကတဲာ်ကတီၤလၢပဂီၢ်တဖၣ်ကိးမုၢ်နံၤဒီးတၢ်လၢအအိၣ်လၢအပူၤလၢအမ့ၢ်တၢ်ဘၣ်အၢဘၣ်သီသ့ၣ်တဖၣ်အိၣ်ဝဲဒၣ်အလီၢ်တအိၣ်လၢၤဘၣ်ဒီးကဟးထီၣ်ကွံာ်ဝဲခဲလၢာ်လီၤ.ဒ်န့ၣ်အသိးစ့ၢ်ကီးပမ့ၢ်ဂၢ်လီၤထံဘၣ်အၢဘၣ်သီလၢပခွးပူၤလၢမ့ၢ်တၢ်ဒူးကဒ့ၣ်,တၢ်ပာ်ဒ့ၣ်ပာ်ကမၣ်တၢ်အၢတၢ်သီသ့ၣ်တဖၣ်ဒီးပခွးလၢအပှဲၤတ့ၢ်ဝဲဒီးတၢ်ဘၣ်အၢဘၣ်သီန့ၣ်ကဘၣ်အၢဘၣ်သီဒိၣ်န့ၢ်အလီၢ်တက့ၢ်လီၤ.

ခံဆ့ၣ်နီၤလၢပှၤတ့ဝဲလၢပှၤကဆ့ၣ်နီၤတဂၤအဂီၢ်န့ၣ်,ပှၤဆ့ၣ်နီၤသ့ဝဲဒၣ်ထဲတဂၤဧိၤလီၤ.တုၤမ့ၢ်ပှၤမ့ၢ်ဆ့ၣ်နီၤခံဂၤဒီးကဟးဂီၤဝဲဒၣ်လီၤ.တၢ်အိၣ်မူလၢယွၤဟ့ၣ်လီၤပှၤအံၤမ့ၢ်ဒၣ်လၢအဝဲဒၣ်တဂၤဧိၤအဂီၢ်လၢကအိၣ်ဆိးဒီးပၢဘၣ်ပတၢ်အိၣ်မူန့ၣ်လီၤ.တုၤမ့ၢ်ပပျဲကစၢ်အဂုာ်အဂၤဟဲနုာ်လီၤဒီးကစၢ်သ့ၣ်တဖၣ်တဘၣ်ကီဘၣ်ခဲဘၣ်မ့ၢ်ဒၣ်လၢပနီၢ်ကစၢ်ကဘၣ်ကီဘၣ်ခဲဝဲန့ၣ်လီၤ.ပှၤသးပှၢ်လၢပျၢၤဒိတ့ၢ်ဝဲလၢထါဒီးစံးဝဲ: “ခိၣ်တဖျၢၣ်တီနာ် တဖျၢၣ်, တီနာ်ခံဖျၢၣ်နာ်ကျံာ်ကျုာ်”. ကစၢ်ခံဂၤအတၢ်မၤန့ၣ်ပမၤအီၤတသ့ဘၣ်.

မ်ပကဂၢ်လီၤတၢ်စံးထီၣ်ပတြၢၤယွၤကိးမုၢ်နံၤဒဲးဒီးသူၣ်အၢသးသီသ့ၣ်တဖၣ်ကဃ့ၢ်ထီၣ်ကွံာ်ဒၣ်အတၢ်လီၤ.နမ့ၢ်မၤကွၢ်မးနကသ့ၣ်ညါဘၣ်လီၤ.ဖဲလၢနမံၤဂဲၤထၢၣ်, ,ဖဲနအီထီၣ်ထံတခွး, ဖဲနနုာ်လီၤလၢသိလ့ၣ်ပူၤ, ဖဲနအိၣ်အလီၢ်တပူၤပူၤ,ဖဲနမၤတၢ်တမံၤမံၤစံး ”ယစံးဘျုးနၤလီၤကစၢ်ဧၢ”, နတၢ်အိၣ်မူကပှဲၤလုာ်ကွံာ်ဒီး တၢ်ထုကဖၣ်အတၢ်စံးထီၣ်ပတြၢၤလီၤ.

တၢ်ထုကဖၣ်- ပၢ်ကစၢ်ယွၤဧၢ,ယစံးဘျုးနၤလၢနဒုးထံၣ်ယၤလၢနဘျုးနဖှိၣ်အသီအသီထီဘိအဃိလီၤ.ဟ့ၣ်ယၤသးဖိလၢကသ့ထံၣ်ဘၣ်နတၢ်မၤအသီလၢယဂီၢ်,ဒီးယကသူၣ်ပိၢ်သးဝးလၢတၢ်စံးထီၣ်ပတြၢၤနၤအါထီၣ်ဒိၣ်ထီၣ်ဒီးယကစှၤလီၤကွံာ်တစဲးဘၣ်တစဲးလၢတၢ်ကဒူၣ်ကဒ့ၣ်ဒီးလၢခံကတၢၢ်လၢာ်ကွံာ်လၢတၢ်ဒူးကဒ့ၣ်သ့ၣ်တဖၣ် န့ၣ်လီၤ. လၢယ့ၣ်ၡူးခရံာ်အမံၤယစံးဘျုးနၤလီၤ.

နံၣ်သီလါသီအတၢ်ဃူတၢ်ဖိးအိၣ်ဒီးသုထီဘိ… အၤမ့ၤ