တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ကစၢ်ယွၤအတၢ်တိၢ်နီၣ်တဂ့ၤထဲသိးပှၤကညီဘၣ်

ဝံယံးရမံယၤ 31:33 – 34 

မ့မ့ၢ်အအံၤမ့ၢ်တၢ်အၢၣ်လီၤအီလီၤလၢယကအၢၣ်လီၤအီလီၤဒီးအံၣ်စရ့လးအပှၤဟံၣ်ဖိ,ယကပာ်ယတၢ်သိၣ်တၢ်သီလၢအသးကံၢ်ပူၤ,ဒီးယကကွဲးအီၤလၢအသးအလိၤ,ဒီးယကကဲထီၣ်အကစၢ်,ဒီးအဝဲသ့ၣ်တဖၣ်န့ၣ်ကကဲထီၣ်ယခ့ယပှၤလီၤ.ဒီးတသိၣ်လိလၢၤဘၣ်တဂၤပှၤလၢအဃၢၤ,တဂၤအဒီပုၢ်ဝဲၢ်,ဒီးစံး,သ့ၣ်ညါယွၤတက့ၢ်န့ၣ်ဘၣ်.အဂ့ၢ်ဒ်အံၤ,ပှၤကသ့ၣ်ညါယၤခဲလၢာ်လၢအဆံးပၢၢ်လၢအဒိၣ်,ယွၤစံးဝဲဒၣ်,အဂ့ၢ်ဒ်အံၤ,ယကပျၢ်အတၢ်ကမၣ်ဒီးတသ့ၣ်နီၣ်ထီၣ် က့ၤလၢၤဘၣ်အတၢ်ဒဲးဘးန့ၣ်ဘၣ်.

တုၤကစၢ်ယွၤပျၢ်ပတၢ်ဒဲးဘးဝံၤန့ၣ်ပမၤတၢ်ကမၣ်မနုၤလဲၣ်န့ၣ်တိၢ်နီၣ်ဝဲတဘၣ်လၢၤဘၣ်.ကစၢ်ယွၤအတိၢ်နီၣ်တဂ့ၤထဲသိးဒီးပှၤကညီဘၣ်.မ့မ့ၢ်ပှၤကညီတိၢ်နီၣ်တၢ်ဃံးမးလီၤ.အဃိကစၢ်ခ ရံာ်ထၢနုာ်ဝဲလၢအတၢ်ထုကဖၣ်ပူၤလၢအသိၣ်လိပှၤ”ပျၢ်လၢ်ဘၣ်ပကမၢ်ဒ်ပပျၢ်ကွံာ်ပှၤဂၤအကမၢ်အသိးတက့ၢ်”.ခရံာ်အတၢ်ထုကဖၣ်တတီၤအံၤပမ့ၢ်ဆိကမိၣ်အီၤထံထံန့ၣ်ပတဲထီၣ်ဖဲျး အီၤမးတဘူၣ်ဘၣ်လီၤ.

တၢ်လၢထံန့ၣ်သ့စီကွံာ်တၢ်ဘၣ်အၢဘၣ်သီသ့ၣ်တဖၣ်လီၤ.ဒီးပနီၢ်ခိက့ၢ်ဂီၤမ့ၢ်ဘၣ်အၢဘၣ်သီန့ၣ်ပသ့ပသးလၢထံလီၤ.ဘၣ်ဆၣ်တုၤမ့ၢ်ပသးလၢအဘၣ်အၢဘၣ်သီန့ၣ်ပသ့အီၤလၢထံတသ့လၢၤဘၣ်.အဃိသတးဒီးထံဧိၤနိဧိၤသ့ပတၢ်ဒဲးဘးတစီဘၣ်,ကစၢ်ယွၤသ့စီကွံာ်ဟီၣ်ခိၣ်လၢထံလၢစီၤနိအးအစိၤဆၢကတီၢ်လၢဟီၣ်ခိၣ်အတၢ်အၢတၢ်သီ,တၢ်ဒဲးဘးအဃိလီၤ.ဒီးပာ်တ့ၢ်ဝဲထဲစီၤနိအၤအဟံၣ်ဖိဃီဖိတဒူၣ်လီၤ.ဘၣ်ဆၣ်တၢ်ဒဲးဘးန့ၣ်ထံသ့အီၤတစီဘၣ်အဃိစီၤနိအၤ တုၤမ့ၢ်အဟဲက့ၤလီၤဆူကဘီပူၤဒီးစးထီၣ်သူၣ်အီၣ်ဖျးအီၣ်သူၣ်လီၤစပံးဒီးမၤအီစပံးထံဒီးမူၤဝဲတုၤတသ့ၣ်နီၣ်အသးလၢၤဘၣ်ဒီးအိၣ်ဘ့ၣ်ဆ့ဝဲဒီးတၢ်ဒဲးဘးန့ၣ်ဟဲက့ၤကဒါက့ၤဆူဟီၣ်ခိၣ်လီၤ. တၢၢ်ကွဲၤဒုးသ့ၣ်နီၣ်ပှၤလၢထံန့ၣ်သ့ပတၢ်ဒဲးဘးတစီဘၣ်အဃိယွၤတသ့စီဟီၣ်ခိၣ်အတၢ်ဒဲးဘးလၢထံနီတဘျီလၢၤဘၣ်.

တုၤမ့ၢ်ယ့ၣ်ၡူးသ့စီပတၢ်ဒဲးဘးလၢအသွံၣ်စီဆှံဒီးပကဲထီၣ်က့ၤပှၤစီဆှံတဂၤလီၤ.ကစၢ်ယွၤတသ့ၣ်နီၣ်ထီၣ်က့ၤဝဲပတၢ်ဒဲးဘးလၢပမၤတ့ၢ်အီၤသ့ၣ်တဖၣ်လၢၤဘၣ်.ကစၢ်ယွၤစံးဘၣ်ပှၤလိၤ လိၤလၢပတၢ်သရူးကမၣ်လၢပမၤတ့ၢ်တဖၣ်န့ၣ်တသ့ၣ်နီၣ်ထီၣ်က့ၤဝဲနီတမံၤလၢၤဘၣ်.ဖဲပဆိကမိၣ်ထီၣ်ပှၤတဂၤလၢအမၤကမၣ်ဘၣ်ပှၤ,ပပျၢ်အတၢ်ကမၣ်တကဲဘၣ်အဆၢကတီၢ်န့ၣ်ဆိကမိၣ်ထီၣ်တၢ်သံကွၢ်ဖိတထံၣ်အံၤ,မ့ၢ်ပဒိးသ့စီကွံာ်ပတၢ်ဒဲးတူၢ်ဒဲးဘးလၢထံဧါ,မ့တမ့ၢ်လၢယ့ၣ်ၡူးအသွံၣ်န့ၣ်ဧါ.ပမ့ၢ်ဒိးသ့စီပသးလၢထံဒီးထီဘိပကသ့ၣ်နီၣ်ထီၣ်ပှၤဂၤအတၢ်သရူၤကမၣ်မ့ၢ် ဂ့ၤ,ပနီၢ်ကစၢ်အတၢ်သရူၤကမၣ်မ့ၢ်ဂ့ၤဒီးပအိၣ်မူဒၣ်လၢပတၢ်ဒဲးဘးအတၢ်ဝံဃၢအပူၤလီၤ.န မ့ၢ်ဒိးသ့စီနသးလၢယ့ၣ်ၡူးအသွံၣ်ဒီးနကသ့ၣ်ညါဘၣ်လၢကစၢ်ယွၤတသ့ၣ်နီၣ်ထီၣ်က့ၤနတၢ်တၢ်သရူၤကမၣ်နီတမံၤလၢၤဘၣ်.ကစၢ်ယွၤပျၢ်ဒီးသးပ့ၤနီၣ်ကွံာ်ဝဲခဲလၢာ်လီၤ.

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. … အၤမ့ၤ