တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

နကဒုးဟးထီၣ်တၢ်မနုၤလဲၣ်

မၢ်ကူး 7:15

တၢ်အိၣ်လၢခိလၢအလဲၤနုာ်ဝဲဆူပှၤကညီအပူၤန့ၣ်,မၤတကဆှီဘၣ်အီၤတသ့ဘၣ်နီတမံၤဘၣ်.မ့မ့ၢ်တၢ်လၢအဟဲထီၣ်လၢအပူၤတဖၣ်န့ၣ်,မ့ၢ်တၢ်လၢအမၤတကဆှီဘၣ်ပှၤကညီလီၤ.

တနံၤဒီးတနံၤန့ၣ်ပနီၢ်ခိအတၢ်မၤအါဝဲဒၣ်ဒိၣ်မးလီၤ.တၢ်လၢပနီၢ်ခိဘၣ်တူၢ်လိာ်ဝဲတဖၣ်တမ့ၢ်ထဲလၢတၢ်အီၣ်တၢ်အီဘၣ်,မ့ၢ်ဝဲတၢ်ဂ့ၢ်တၢ်ကျိၤ,တၢ်လၢထံၣ်ဘၣ်ဝဲ,တၢ်လၢနၢ်ဟူဘၣ်ဝဲ,တၢ်လၢပလၢၢ်ဘၣ်ဝဲ,တၢ် လၢထိးဘၣ်ဝဲတဖၣ်လီၤ.တၢ်သ့ၣ်တဖၣ်အံၤမ့ၢ်တၢ်ခဲလၢာ်လၢအလဲၤနုာ်ဝဲဆူပမိၢ်ပှၢ်အပူၤလီၤ.ဟီၣ်ခိၣ်လၢပအိၣ်ပဆိးလၢအပူၤအံၤပသ့ၣ်ညါလၢအအိၣ်ပှဲၤဝဲထဲတၢ်အၢတၢ်သီလီၤ.ပအိၣ်လၢဟီၣ်ခိၣ်အဃိပမ့ၢ်ပှၤလၢအဘၣ်အၢဘၣ်သီန့ၣ်တမ့ၢ်ဘၣ်.ပှၤသးပှၢ်အတၢ်ကတိၤဒိစံးတ့ၢ်ဝဲ,”ကပံာ်ကျါလၢၢ်ဂ့ၤလီၤဘျၢ,လီၤဘျၢ ဘၣ်ဆၣ်တဘၣ်အၢ”,တၢ်လၢလၢၢ်ဂ့ၤန့ၣ်မ့ၢ်လီၤဘျၢလၢကပံာ်ကျါဘၣ်ဆၣ်နမ့ၢ်ထုးထီၣ်က့ၤအီၤဒီးမ့ၢ်ဒၣ်လၢၢ်ဂ့ၤလီၤ.တၢ်လၢကပံာ်န့ၣ်မၤဘၣ်အၢလၢၢ်သ့ဒၣ်ထဲလၢအဖံးခိၣ်လီၤ.မ့မ့ၢ်လၢလၢၢ်အကံၢ်အလဲအပူၤန့ၣ်ဘၣ်အၢဝဲတန့ၢ်ဘၣ်.ပဝဲပှၤစူၢ်က့ၤနာ်က့ၤတၢ်စ့ၢ်ကီးမ့ၢ်တၢ်ဒံးန့ၣ်လီၤ.ဟီၣ်ခိၣ်အဃံၣ်အမူးအတၢ်ဘၣ်အၢဘၣ်သီသ့ၣ်တဖၣ်အံၤမၤဘၣ်အၢပှၤတုၤလီၤလၢပသူၣ်ပသးတသ့ဘၣ်.

မၢ်ကူး 7:21 တၢ်လၢအဟဲထီၣ်လၢပှၤကညီအပူၤန့ၣ်,မၤတကဆှီဘၣ်ပှၤကညီလီၤ.

တၢ်လၢပဘၣ်ပာ်သူၣ်ပာ်သးအဒိၣ်ကတၢၢ်တခီန့ၣ်,တၢ်လၢအဟးထီၣ်ဝဲလၢပပူၤတခီန့ၣ်မ့ၢ်တၢ်လၢအကါဒိၣ်ဝဲလီၤ.ပကဒုးဟးထီၣ်တၢ်မနုၤလဲၣ်န့ၣ်မ့ၢ်တၢ်လၢအကါဒိၣ်ဒီးအလီၢ်အိၣ်ဝဲလီၤ.အဒိ,တၢ်လၢအဟဲနုာ်ဝဲလၢပနီၢ်ခိအပူၤလၢအမ့ၢ်တၢ်အီၣ်တၢ်အီတဖၣ်န့ၣ်ပနီၢ်ခိၣ်က့ၢ်ဂီၤလၢပပူၤတဖၣ်ဒုးဟးထီၣ်က့ၤဝဲလၢအမ့ၢ်တၢ်ဘၣ်အၢဘၣ်သီ,တၢ်အ့ၣ်တၢ်ဆံၣ်တဖၣ်လီၤ.တၢ်သ့ၣ်တဖၣ်အံၤပဒုးဟးထီၣ်ကွံာ်အီၤလၢအလီၢ်ဒၣ်ဝဲလၢတၢ်ဘံၣ်တၢ်ဘၢအလီၢ်ဒ်သိးအသုတဘၣ်ဒိဘၣ်ထံးပှၤအဂၤတဂ့ၤလီၤ.တၢ်လၢပကဘၣ်ကွၢ်ဆိကမိၣ်ဖဲအံၤန့ၣ်,တၢ်ပကဘၣ်ဒုးဟးထီၣ်အီၤတဖၣ်န့ၣ်မ့ၢ်တၢ်ဂ့ၤဧါ,မ့ၢ်တၢ်ဘၣ်အၢဘၣ်သီဧါန့ၣ်ပကဘၣ်သ့ၣ်ညါလီၤ.မ့မ့ၢ်တၢ်လၢပဒုးဟးထီၣ်အီၤတဖၣ်န့ၣ်မ့ၢ်တၢ်ဂ့ၤဒီးပဒုးဟးထီၣ်အီၤလၢပှၤအါဂၤအမဲာ်ညါဒီးကဲထီၣ်တၢ် ဆိၣ်ဂ့ၤဆိၣ်ဝါလီၤ.ဃ့ယွၤအသးစီဆှံဒ်သိးကမၤစၢၤနၤလၢနကဒုးဟးထီၣ်ဘၣ်တၢ်ဂ့ၤတၢ်ဝါ,တၢ်ဆိၣ်ဂ့ၤ ဆိၣ်ဝါ,တၢ်ကတိၤဟ့ၣ်ဂံၢ်ဟ့ၣ်ဘါ,တၢ်ကတိၤလၢအမၤမုာ်ပှၤအသးတဖၣ်ဒီးဒုးဟးထီၣ်အီၤလၢပှၤအါဂၤအမဲာ်ညါတက့ၢ်.

တၢ်ထုကဖၣ် - 

ပၢ်ကစၢ်ယွၤဧၢ,ယစံးဘျုးနၤလၢနဆိၣ်ဂ့ၤယတၢ်အိၣ်မူ,ဒီးပာ်လီၤယၤလၢဟီၣ်ခိၣ်အံၤမ့ၢ်ဒ်သိးယကဘၣ်ကဲထီၣ်တၢ်ဆိၣ်ဂ့ၤလၢပှၤအါဂၤအဂီၢ်လီၤ.သူယၤဒ်တၢ်ပိးတၢ်လီတခါအသိးလၢနဘီမုၢ်အဂီၢ်တက့ၢ်.မၤစၢၤယၤဒ်သိးယကသ့ဟ့ၣ်ထီၣ်တၢ်အဂ့ၤကတၢၢ်ဆူပှၤအါဂၤအဂီၢ်တက့ၢ်.လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်… အၤမ့ၤ