တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

အိၣ်ဃိ

စံးထီၣ်ပတြၢၤ 46:10

အိၣ်ဃိကလာ်,ဒီးသ့ၣ်ညါလၢယမ့ၢ်ယွၤက့ၢ်.ယကအိၣ်ထီၣ်ထီလၢပှၤကလုာ်တဖၣ်အကျါ,ယကအိၣ်ထီၣ်ထီလၢဟီၣ်ခိၣ်ချၢလီၤ.

ဆၢကတီၢ်မုၢ်မဆါတနံၤညါအံၤ,ဟီၣ်ခိၣ်အံၤပှဲၤလုာ်ကွံာ်ဒီးစဲးဖီကဟၣ်အတၢ်လဲၤထီၣ်လဲၤထီသ့ၣ်တဖၣ်လၢအမ့ၢ်ခီၣ်ဖၠူထၢၣ်,လီတဲစိ,လီဘ့ၣ်ဘၣ်လၢပကိးအီၤလၢအါဖဲး,အါဖီး,အါဖိ,တၢ်လိာ်ကွဲတဖၣ်အိၣ်ဝဲအကလုာ်ကလုာ်ထုးန့ၢ်ပှၤအသးစးထီၣ်လၢဖိသၣ်တုၤလီၤလၢသးပှၢ်တဖၣ်လီၤ.လၢတၢ်လဲၤထီၣ်လဲၤထီဒ်သိးအံၤအဃိပှၤကိးဂၤဒဲးန့ၣ်ဖျါလၢတနံၤဒီးတနံၤန့ၣ်အတၢ်မၤအါဝဲဒၣ်ဒိၣ်မးလီၤ.လီာ်ဂာ်မးဒ်သိးတနံၤခံဆံလွံၢ်နၣ်ရံၣ်လၢပဂီၢ်န့ၣ်တလၢဒံးဝဲဘၣ်လီၤ.ဆၢကတီၢ်တဖၣ်လဲၤပူၤကွံာ်ဝဲချ့မးလၢစဲးဖီကဟၣ်တဖၣ်အံၤဟံးန့ၢ်ကွံာ်ပတၢ်လီၢ်တၢ်ကျဲ,တၢ်ဆၢကတီၢ်တဖၣ်န့ၣ်လီၤ.လၢအီးစထြ့လံယါအပူၤဖိသၣ်ခံဆံသၢမျးကယၤန့ၣ်ဖုးသံနီၣ်ထီၣ်တဘျီဃီအိၣ်ဝဲဒၣ်လၢစဲးဖီကဟၣ်လီဘ့ၣ်ဘၣ်တဖၣ်အမဲာ်ညါလီၤ.

တၢ်လၢယသးအိၣ်ဟ့ၣ်ဂံၢ်ဟ့ၣ်ဘါသုန့ၣ်,မ့ၢ်ပသးဟံးန့ၢ်တၢ်အိၣ်ဘှံးလၢယွၤအပူၤအိၣ်ကစီဒီဒံးဧါ.ကစၢ်ယွၤအကလုၢ်ကထါစံးဘၣ်ပှၤ,အိၣ်ဃိကလာ်,ဒီးသ့ၣ်ညါလၢယမ့ၢ်ဒၣ်ယွၤလီၤ.စဲးဖီကဟၣ်တၢ်လဲၤထီၣ်လဲၤထီအပိးအလီတဖၣ်အံၤဟံးန့ၢ်ကွံာ်ဝဲဒၣ်ယွၤအတၢ်လီၢ်လၢပတၢ်အိၣ်မူအဆၢကတီၢ်တဖၣ်အပူၤလီၤ.တၢ်မၤလိာ်အဘီတဆံအကျါတထံၣ်န့ၣ်စံးဘၣ်ပှၤ,တ့တၢ်ဂီၤတၢ်ဖီၣ်လၢနဂီၢ်ဒီးဘါအီၤတဂ့ၤ.ဆၢကတီၢ်ခဲအံၤတၢ်ဂီၤတဖီၣ်တဖၣ်လၢအမ့ၢ်အါဖဲး,အါဖီးတဖၣ်အံၤနုာ်လီၤဒိၣ်စိဝဲလၢပတၢ်အိၣ်မူအပူၤ,ပဖိသ့ၣ်တဖၣ်အပူၤလံလီၤ.

အိၣ်ဃိ,စံးတၢ်န့ၣ်မ့ၢ်ဝဲ,အိၣ်ဘှီၣ်,အိၣ်ကစုဒုဖိ,ပာ်ကွံာ်တၢ်ခဲလၢာ်ခဲဆ့လၢတၢ်ကပၤဒီးအိၣ်ဘှံးလၢယွၤအပူၤတက့ၢ်.ပှၤလၢတၢ်ဘှံးအသးဒီးဝံတၢ်ယိးတၢ်ဃၢခဲလၢာ်သ့ၣ်ဧၢ,ဟဲဆူယအိၣ်တက့ၢ်,ယကဒုးအိၣ်ဘှံးသုလီၤ.ဆၢကတီၢ်ခဲအံၤပအိၣ်လၢစဲးဖီကဟၣ်တၢ်လဲၤထီၣ်လဲၤထီတဖၣ်အနီၣ်ယိးဘိအဖီလာ်လီၤ.ကစၢ်ယွၤအကလုၢ်ကထါအၢၣ်လီၤပှၤလၢဖဲလၢပအိၣ်ဃိ,အိၣ်ဘှံးလၢယွၤအပူၤန့ၣ်ကအိၣ်ထီၣ်ထီလၢပှၤကလုာ်တဖၣ်အကျါဒီးလၢဟီၣ်ခိၣ်ချၢလီၤ.ဖဲလၢပှၤအဂုာ်အဂၤသးခုတကဲဘၣ်အဆၢကတီၢ်န့ၣ်ပဒိးန့ၢ်သးအတၢ်သူၣ်ခုသးခုနီၢ်နီၢ်လီၤ.လၢတနံၤအတီၢ်ပူၤပမ့ၢ်ဟံးန့ၢ်တၢ်ဆၢကတီၢ်လၢပကအိၣ်ဃိထဲစှၤမံးနံးအတီၢ်ပူၤန့ၣ်ကမ့ၢ်တၢ်ဂံၢ်တၢ်ဘါလၢပဂီၢ်ထဲလဲၣ်,မၤကွၢ်တက့ၢ်.

တၢ်ထုကဖၣ် - 

ပၢ်ကစၢ်ယွၤဧၢ,ယစံးဘျုးနၤလၢစဲးဖီကဟၣ်အတၢ်လဲၤထီၣ်လဲၤထီတဖၣ်အဃိလီၤ.လၢတၢ်သ့ၣ်တဖၣ်အံၤအဃိတၢ်သးခုကစီၣ်ရၤလီၤအသးချ့မး,ဒီးလၢတၢ်သ့ၣ်တဖၣ်အံၤအဃိပှၤအါဂၤလီၤဘှံးလီၤလီၤတီၤဝဲလၢ နီၢ်ယိးဘိအံၤအဖီလာ်လီၤ.ဆိၣ်ဂ့ၤပှၤဒ်သိးပကသးခုဘၣ်လၢနပူၤတက့ၢ်.လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်… အၤမ့ၤ