တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ယ့ၣ်ၡူးအတၢ်အိၣ်ဖျဲၣ်အကစီၣ်ဟူယံၤမး

လံာ်မးသဲ 2:2, ပှၤအိၣ်ဖျဲၣ်ယူဒၤအစီၤပၤန့ၣ်မ့ၢ်အအိၣ်ဖဲလဲၣ်,အဂ့ၢ်ဒ်အံၤ,ပထံၣ်ဘၣ်အဆၣ်တဖျၢၣ်လၢမုၢ်ထီၣ်န့ၣ်,ဒီးပဟဲဘူၣ်ထီၣ်ဘါထီၣ်အီၤလီၤ.

အါဘျီပတပာ်သူၣ်ပာ်သးလၢပှၤမၢ်ကူးဖိသ့ၣ်တဖၣ်အတၢ်အိၣ်မူအဂ့ၢ်အကျိၤဘၣ်.ပဆိကမိၣ်ဒၣ်ထဲလၢအဝဲသ့ၣ်မ့ၢ်ပှၤတဖၣ်လၢအသူၣ်အိၣ်သးအိၣ်လူၤဃုယ့ၣ်ၡူးခရာ်လီၤ.တၢ်အနီၢ်နီၢ်တခီန့ၣ်ပှၤသ့ၣ်တဖၣ်အံၤမ့ၢ်ပှၤကူၣ်ဘၣ်ကူၣ်သ့,ပှၤစဲအ့ၣ်ဖိ,ပှၤလူၤတၢ်စိတၢ်ကမီၤလၢအဘၣ်ဃးတၢ်လၢသူၣ်လၢသး,ပှၤမၤကဒါပှၤအ မဲာ်ဒီးပှၤသ့ၣ်တဖၣ်အံၤမ့ၢ်တၢ်လၢယွၤတြီအပှၤဂီၢ်မုၢ်လၢအသုတလူၤတၢ်အိၣ်မူဒ်သိးပှၤအံၤတဖၣ်တဂ့ၤလီၤ. ကစၢ်ယွၤန့ၣ်ဒုးထံၣ်ပှၤတၢ်လၢပထံၣ်အီၤသ့သ့ၣ်တဖၣ်လီၤ.တၢ်လၢပထံၣ်အီၤတသ့ဘၣ်န့ၣ်အဝဲဒၣ်တဒုး ထံၣ်ပှၤဘၣ်.ဒုးထံၣ်ပှၤဒၣ်လဲာ်ပတထံၣ်ဘၣ်ဒီးပတနၢ်ပၢၢ်စ့ၢ်ကီးဘၣ်.ကစၢ်ယ့ၣ်ၡူးအတၢ်ဟဲအိၣ်ဖျဲၣ်ထီၣ်န့ၣ်ဘၣ်တၢ်သ့ၣ်ညါအီၤလၢအိၣ်လၢတၢ်လီၢ်ကိးပူၤဒဲးလီၤ.ပှၤအိၣ်လၢမုၢ်ထီၣ်ဂ့ၤမုၢ်နုာ်ဂ့ၤသ့ၣ်ညါဝဲသ့လီၤ.ဒ် န့ၣ်အသိးအတၢ်ဟဲက့ၤကဒါက့ၤစ့ၢ်ကီးဒ်အကလုၢ်အိၣ်ဝဲအသိး,ကဘၣ်တၢ်သ့ၣ်ညါအီၤလၢမုၢ်ထီၣ်တုၤလၢမုၢ်နုာ်လီၤ.

ပအိၣ်ဖဲလဲၣ်ဂ့ၤဂ့ၤပထံၣ်န့ၢ်ယ့ၣ်ၡူးသ့ဝဲလီၤ.တၢ်လၢအကါဒိၣ်တခီန့ၣ်တၢ်လၢပထံၣ်အီၤသ့သ့ၣ်တဖၣ်ပဘၣ်အိးထီာ်ပမဲာ်ဒီးပသးဒီးပကထံၣ်ဘၣ်အီၤလီၤ.ပှၤမၢ်ကူးဖိဟဲလၢမုၢ်ထီၣ်တုၤဆူယရူၤဂှလ့ၣ်ဒီးသ့ၣ်ညါဝဲလီၤတံၢ်လၢဖိသၣ်လၢအအိၣ်ဖျဲၣ်တဂၤမ့ၢ်ဝဲယူဒၤအစီၤပၤလီၤ.မ့ၢ်မ့ၢ်ပှၤဝ့ၢ်ဖိလၢအအိၣ်ဖဲဟီၣ်ကဝီၤပူၤတဖၣ်တသ့ၣ်ညါတၢ်နီတမံၤဒ်ဘၣ်.

ပှၤမၢ်ကူးဖိအသကဲးပဝးမ့ၢ်တၢ်လီၤသးဘၣ်အၢလၢယွၤအမဲာ်ညါလီၤ.အဝဲသ့ၣ်တမ့ၢ်ပှၤယူဒၤဖိဘၣ်.တမ့ၢ်ပှၤလၢအနာ်လၢယွၤအိၣ်ဘၣ်.မ့မ့ၢ်ယ့ၣ်ၡူးအတၢ်ဟဲအိၣ်ဖျဲၣ်ထီၣ်န့ၣ်ဒုးထံၣ်ပှၤတဘျီဃီလၢအတၢ်အဲၣ်န့ၣ် မ့ၢ်လၢပှၤကိးဂၤဒဲးအဂီၢ်,ဒီးတၢ်သးခုကစီၣ်အံၤမ့ၢ်လၢပှၤကိးဂၤကနၢ်ဟူဘၣ်ဝဲဒီး,သ့ၣ်ညါဝဲသ့အဂီၢ်လီၤ. လၢပှၤကူၣ်ဘၣ်ကူၣ်သ့အဂီၢ်အဝဲဒၣ်ဒုးသ့ၣ်ညါဝဲတမံၤ,ဒီးလၢပှၤပတီၢ်မုၢ်ဖိအဂီၢ်ဒုးသ့ၣ်ညါဝဲတမံၤလီၤ.အဃိပထံၣ်ဘၣ်လၢပှၤကွၢ်သိသ့တဖၣ်န့ၣ်မူခိၣ်ကလူးဘၣ်ကတိၤတၢ်ဒီးအီၤလိၤလိၤလီၤ.ပတၢ်အိၣ်မူကအိၣ်ဝဲဒ်လဲၣ်ဂ့ၤဂ့ၤ,ပမၤတၢ်အၢတၢ်သီဒ်လဲၣ်ဂ့ၤဂ့ၤ,ကစၢ်ယွၤအတၢ်လီၣ်ဖျါထီၣ်အသးလၢပဂီၢ်အိၣ်ဝဲထီဘိ,လၢပှၤကိးဂၤအဂီၢ်,လၢပှၤကလုာ်ခဲလၢာ်အဂီၢ်လီၤ.တၢ်လၢပထံၣ်အီၤသ့တဖၣ်န့ၣ်အဝဲဒၣ်ကဒုးထံၣ်ပှၤဒီးထဲဒၣ်ပဘၣ်အိးထီၣ်ပမဲာ်လဲၢ်လဲၢ်ထီဘိန့ၣ်လီၤ.

တၢ်ထုကဖၣ်- ပၢ်ကစၢ်ယွၤဧၢ, အိးထီၣ်ယမဲာ်ဒ်သိးယကထံၣ်ဘၣ်တၢ်လၢယထံၣ်ဒီးနၢ်ပၢၢ်အီၤသ့သ့ၣ် တဖၣ်တက့ၢ်.မ်တၢ်လၢနဒုးထံၣ်ယၤလၢတနွံအံၤအတီၢ်ပူၤတဖၣ်န့ၣ်အသုတလဲၤသဒၣ်ယၤတဂ့ၤ.လၢယ့ၣ်ၡူးခရံာ်အမံၤယစံးဘျုးနၤလီၤ.
ခရံာ်အိၣ်ဖျဲၣ်အတၢ်ဃူတၢ်ဖိးအိၣ်ဒီးသုထီဘိ… အၤမ့ၤ