တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

တၢ်ဃူတၢ်ဖိး

စံးထီၣ်ပတြၢၤ 133 : 1 

ဒီပုၢ်ဝဲၢ်အိၣ်ဝဲဆိးဝဲလၢသးတဖျၢၣ်ဃီအံၤ,ဂ့ၤဆံးဒိၣ်လဲၣ်,မုာ်ဆံးဒိၣ်လဲၣ်,ဆံးဒိၣ်လဲၣ်န့ၣ်ကွၢ် ကွၢ်တက့ၢ်.

တၢ်ကတိၤအိၣ်ဝဲ,ပှၤတကလုာ်လၢအတၢ်ဃူတၢ်ဖိးတအိၣ်န့ၣ်,အထံကီၢ်ဘီမုၢ်တၢ်သဘျ့ဒၣ်ဝဲတအိၣ်,ဒီးအိၣ်ဝဲတသ့စ့ၢ်ကီးဘၣ်.ပှၤကညီထါစံးစ့ၢ်ကီးဝဲ,ဒီပုၢ်ဝဲၢ်ပသးမ့ၢ်ဃူပိာ်ထီၣ်ဃီလဲၤ ထီၣ်ဆူမူ,ဒီပုၢ်ဝဲၢ်သးမ့ၢ်ဒ်သိး,ဘၢလၢၢ်မံဒံးနွဲၣ်အသိးစ့ၢ်ကီးလီၤ.တၢ်ဃူတၢ်ဖိးမ့ၢ်တၢ်အရ့ဒိၣ်နီၢ်ကီၢ်လၢတၢ်ခဲလၢာ်အဂီၢ်လီၤ.ပှၤတဂၤလၢအဝာ်ဖှိၣ်အပှၤကလုာ်တဖှိၣ်ဒိၣ်န့ၢ်ဝဲတဂၤန့ၣ် မ့ၢ်ပှၤလၢအကြၢးဒီးကလုာ်ခိၣ်နၢ်ဒိၣ်အလၤကပီၤလီၤ.

တၢ်ဃူတၢ်ဖိးအံၤစးထီၣ်ဒၣ်အသးလၢဟံၣ်တဖျၢၣ်အပူၤ,ဒူၣ်ထၢတဒူၣ်,သဝီတဖျၢၣ်,တဆီဘၣ်တဆီတုၤထီၣ်ဆူပှၤဒီကလုာ်,ထံကီၢ်ဒီဘ့ၣ်န့ၣ်လီၤ.ပဝာ်ဖှိၣ်လိာ်ပသးမ့ၢ်တန့ၢ်,ပစၢဖှိၣ်လိာ်ပသးမ့ၢ်တဃံး,ပတၢ်သးလီၤပလိာ်မ့ၢ်တအိၣ်,ပထိၣ်ဃူထိၣ်ဖိးလိာ်ပသးလၢပှၤတဝၢတၢ်မၤသကိးပူၤမ့ၢ်တန့ၢ်န့ၣ်,တၢ်ဃူတၢ်ဖိးအနီၢ်အလဲတအိၣ်ဒံးဒီးပှၤဘၣ်. 

ပလဲၤထီၣ်ဒိကနၣ်တၢ်အိၣ်ဖှိၣ်,နၢ်ပၢၢ်လိာ်ပသးလၢတၢ်အိၣ်ဆိးသကိးပူၤ,မၤစၢၤလိာ်ပသး, ကွၢ်ကပာ်ကွံာ်တၢ်လၢအဘျုးတအိၣ်တဖၣ်န့ၣ်မ့ၢ်တၢ်ဃူတၢ်ဖိးအပနီၣ်လၢအဂ့ၤတဖၣ်လီၤ.ပမှံၤပှၢ်တၢ်ကတိၤအိၣ်ဝဲ,ဝၣ်တဘိတတဲာ်ထံ,ဘုတဖျၢၣ်တကဲမ့ၤ,ရိၣ်ဖှိၣ်သးပဆၢထၢၣ်,ကျီၢ်လီၤဖးဘၣ်ခ့သး,ပမံသကိးအါဂၤလၢၤ,ပအီၣ်သကိးအါဂၤဝံၣ်,တၢ်ကတိၤတဖၣ်အံၤမ့ၢ်တၢ်ဝာ်ဖှိၣ်လိာ်သးအဂီၢ်လီၤ.

မ့ၢ်ပမၤဃူမၤဖိးလိာ်ပသးကန့ၢ်လၢကျဲဖဲလဲၣ်တဘိလဲၣ်.လၢတၢ်စူၢ်တၢ်နာ်တၢ်ဘူၣ်တၢ်ဘါသနၢၣ်ဧါ,လၢကလုာ်ဂ့ၢ်ဝီ,ထံရူၢ်ကီၢ်သဲးတကွီၢ်ဧါ,လၢပီညါဒ့သးဝံၣ်လံာ်လဲၢ်ဧါ,

ပတၢ်မၤဃူလိာ်ဖိးလိာ်ပသးဒီးယွၤမ့ၢ်တအိၣ်ဘၣ်န့ၣ်,ပကဃုတၢ်ဃူတၢ်ဖိးဖဲလဲၣ်ဘၣ်ဆၣ်ပဃုအီၤတန့ၢ်ဝဲဒၣ်ဘၣ်လီၤ.

မ်ယွၤအတၢ်ဃူတၢ်ဖိးအိၣ်ဒီးသုဝဲခဲလၢာ်တက့ၢ်.

တံကရၣ်ခိၣ်