တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

မံၤလၢအိၣ်ဒီးအလၤကပီၤ

1 မိၤဂှ့ 35 : 17

နီၢ်ရၤဃ့လးအဟုးဆါထီၣ်ဒီးအဟုးဆါအဖၢမုၢ်န့ၣ်ဘၣ်တၢ်ကီတၢ်ခဲလီၤ.ဒီးတၢ်မၤအသးလၢအဟုးဆါ,ဒီးဘၣ်တၢ်ကီတၢ်ခဲအဖၢမုၢ်န့ၣ်,ပှၤကွၢ်ဟုးတဂၤစံးဘၣ်အီၤ,ဘၣ်ယိၣ်တဂ့ၤ.အဂ့ၢ်ဒ်အံၤ,နကအိၣ်ဒီးနဖိခွါတဂၤအံၤစ့ၢ်ကီးလီၤ.ဒီးတၢ်မၤအသးလၢအသးဟးထီၣ်အဖၢမုၢ်န့ၣ်ယုၢ်ဝဲအမံၤလၢဘံၣ်အိနံလီၤ.မ့မ့ၢ်အပၢ်တဂၤန့ၣ်ယုၢ်ဝဲအမံၤလၢဘံၣ်ယၤမံၣ်လီၤ.

ဖဲနီၢ်ရၤဃ့လးဆံးစၢ်ထီၣ်အဖိခွါဘံၣ်ယၤမံၣ်န့ၣ်,တူၢ်ဘၣ်ဝဲတၢ်ဆါနးနးကလဲာ်တုၤဒၣ်လဲာ်အသးသမူဘၣ်ဟးထီၣ်ကွံာ်ဝဲန့ၣ်လီၤ.ဖဲအသးသမူကဟးထီၣ်န့ၣ်ယုၢ်ဝဲဒၣ်အဖိခွါအံၤမံၤလၢဘံၣ်အိနံ(အခီပညီမ့ၢ်ဝဲ,ယတၢ်သးအုးအဖိခွါ).ဖိခွါတဂၤအံၤအတၢ်အိၣ်ဖျဲၣ်ထီၣ်န့ၣ်ဟံးန့ၢ်ကွံာ်ဝဲအမိၢ်အသးသမူလီၤ.တုၤမ့ၢ်ဖိခွါတဂၤအံၤမ့ၢ်ဒိၣ်ထီၣ်ဒီးပှၤကသ့ၣ်ညါအီၤလၢအအိၣ်ဖျဲၣ်ထီၣ်န့ၣ်အမိၢ်အသးသမူဟးထီၣ်ကွံာ်ဝဲလီၤ.မံၤတဖျၢၣ်အံၤတမ့ၢ်မံၤလၢပှၤနၢ်ဟူဒီးကဲထီၣ်တၢ်သူၣ်ခုသးခုလၢပှၤဂၤအဂီၢ်ဘၣ်.အဃိစီၤယၤကိာ်ကိးက့ၤဖိခွါဝဲအံၤအမံၤလၢဘံၣ်ယၤမံၣ်အခီပညီမ့ၢ်ဝဲ(ဖိခွါလၢယစုထွဲ).မံၤလၢအပာ်ဖျါထီၣ်ပတၢ်တူၢ်ဘၣ်ခီၣ်ဘၣ်တၢ်လဲၤခီဖျိန့ၣ်ကဟ့ၣ်ပှၤတၢ်သူၣ်အုးသးအုးထီဘိလီၤ.ကစၢ်ယွၤတအဲၣ်ဒိးဝဲလၢပကဘၣ်စိာ်ဃုာ်ပတၢ်သူၣ်အုးသးအု,ပတၢ်တူၢ်ဘၣ်ခီၣ်ဘၣ်တမုာ်တလၤလၢပတၢ်အိၣ်မူအပူၤဘၣ်.စီၤယၤကိာ်မ့ၢ်ဟံးန့ၢ်ဖိခွါအံၤအမံၤလၢ(ယတၢ်သးအုးအဖိခွါ)န့ၣ်အဝဲကသ့ၣ်နီၣ်ဒၣ်အမါနီၢ်ရၤဃ့လးလၢအဲၣ်ဝဲဒိၣ်တဂၤထီဘိလီၤ.ကမူဆူညါ,ကမၤတၢ်ဆူညါလၢအပှဲၤဒီးတၢ်ဂံၢ်ဆူၣ်ဘါဆူၣ်အဂီၢ်န့ၣ်တၢ်ကထုးလီၤကွံာ်အီၤထီဘိလီၤ.

စီၤယၤကိာ်အဲၣ်ဒိးအိၣ်မူဝဲလၢတၢ်သူၣ်ခုသးခုအပူၤအဃိပာ်သးပ့ၤနီၣ်ကွံာ်တၢ်ဝံတၢ်ယိးအဃၢ,တၢ်လဲၤခီဖျိလၢတမုာ်တလၤလၢအကထုးလီၤဃံၤက့ၤအီၤန့ၣ်လီၤ.အဃိအဝဲဒၣ်ကိးက့ၤအဖိခွါအမံၤလၢ(ဖိခွါလၢယစုထွဲ)လီၤ.အခီပညီမ့ၢ်ဝဲ,ဖိခွါအံၤကမ့ၢ်ယတၢ်သန့ၤအလီၢ်,ဒီးယတၢ်ဂံၢ်တၢ်ဘါလီၤ.ပထံၣ်ဘၣ်လၢဖိခွါဘံၣ်ယၤမံၣ်အပူၤန့ၣ်စီၤပၤစီၤစီလူးဟဲထီၣ်ဝဲလၢအပူၤ,ဒီးစီၤပီလူးစ့ၢ်ကီးဟဲထီၣ်ဝဲဖဲန့ၣ်လီၤ.

တနံၤဒီးတနံၤန့ၣ်ပကဘၣ်မူလၢတၢ်သူၣ်ဖှံသးညီအပူၤလီၤ.ကိးနံၤဒဲးဖဲပဖုးသံနီၣ်ထီၣ်န့ၣ်ပကဘၣ်စံး”တၢ်လၢမုၢ်တနံၤအံၤယွၤတ့ဝဲလီၤ,ယကသူၣ်ဖှံသးညီဒီးသူၣ်ခုသးခုလၢအပူၤလီၤ”.

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. . အၤမ့ၤ