တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

မံၤဒိၣ်လၢဟ့ၣ်မၤဘူၣ်တၢ်အါ

လံာ်မၤတၢ် 5 : 9 သုပာ်သုသးတဖျၢၣ်ဃီဒ်သိးသုကလ့ပစီယွၤအသးဘၣ်မနုၤလဲၣ်

ဒီပုၢ်ဝဲၢ်ကညီဖိခဲလၢာ်သ့ၣ်ဧၢ,မ်သုကဘၣ်အမုာ်လၢယွၤအပူၤထီဘိတက့ၢ်.

ပဝဲဒၣ်ပှၤဟီၣ်ခိၣ်ဖိသ့ၣ်တဖၣ်န့ၣ်အါဒၣ်တက့ၢ်ပအဲၣ်ဒိးလၢပမံၤကဒိၣ်သၣ်သွါ,ပှၤကသ့ၣ်ညါပှၤအါအါလီၤ.အဝဲအံၤမ့ၢ်တၢ်လၤကပီၤတခါလၢပှၤဆၢဒိးန့ၢ်ဘၣ်ဝဲလီၤ.တၢ်မံၤဒိၣ်သၣ်သွါန့ၣ်ကဲထီၣ်ဒၣ်အတၢ်တသ့ဘၣ်,မ့ၢ်ဒၣ်လၢပမၤတၢ်တမံၤမံၤအဃိ,ပှၤသ့ၣ်ညါဝဲ,ဒီးတကးဘၣ်တၢ်လၢပမၤအီၤတမံၤန့ၣ်မ့ၢ်တၢ်လၢအထုးန့ၢ်ပှၤအသးအဃိ,ပှၤသ့ၣ်ညါဘၣ်တကးဘၣ်အမဲာ်ညါပှၤဘၣ်သူၣ်ဘၣ်သးဒီးအဂ့ၢ်အကျိၤအကစီၣ်ဟူထီၣ်ဒိၣ်ထီၣ်ဝဲလီၤ.

ပှၤမံၤဟူသၣ်ဖျါအိၣ်ဝဲအါအါဂီၢ်ဂီၢ်ဒီးတဂၤဒီးတဂၤန့ၣ်အမံၤဟူဝဲလၢတၢ်ဂ့ၢ်အါမံၤအဖီခိၣ်လီၤ.စီၤအနၤနံဒီးနီၢ်စးဖံရးအဲၣ်ဒိးစ့ၢ်ကီးဝဲလၢအမံၤကဟူလီၤ.ပမ့ၢ်ဖးလံာ်မၤတၢ်အဆၢဒိၣ် 5:1-11 န့ၣ်ပကသ့ၣ်ညါဘၣ်တၢ်မၤအသးဒီးပှၤဒီမါဝၤခံဂၤအံၤလၢလၢပှဲၤပှဲၤလီၤ.ဖဲကစၢ်ယ့ၣ်ၡူးက့ၤထီၣ်ဆူမူခိၣ်ဝံၤအလီၢ်ခံန့ၣ်အပျဲၢ်အဘီၣ်သ့ၣ်တဖၣ်ဒိးန့ၢ်ဘၣ်သးစီဆှံတၢ်စိတၢ်ကမီၤဒီးပှၤအါဒံအါဂၤတူၢ်လိာ်က့ၤခရံာ်ဒ်အမ့ၢ်မံၤဂှံယၤနီၢ်နီၢ်န့ၣ်လီၤ.ပှၤစူၢ်က့ၤနာ်က့ၤတၢ်ဖိတဖၣ်အါထီၣ်ဝဲတနံၤဘၣ်တနံၤခီဖျိလၢပှၤတၢ်မၢဖိသ့ၣ်တဖၣ်ဟးအုၣ်သးဒီးစံၣ်တဲၤတဲလီၤခရံာ်အတၢ်ဂဲၤဆၢထၢၣ်က့ၤအကစီၣ်အဃိန့ၣ်လီၤ.ပှၤစူၢ်က့ၤနာ်က့ၤတၢ်ဖိသ့ၣ်တဖၣ်အိၣ်မူဝဲဒံးပှၤတဝၢဖိတဖုအသိး,ပှဲၤဒီးတၢ်အဲၣ်တၢ်ကွံ,တၢ်ကဟုကယာ်လိာ်သးန့ၣ်လီၤ.ပှၤလၢအတၢ်အိၣ်တၢ်ယၢၤတဖၣ်ဆါကွံာ်အစုလီၢ်ခီၣ်ခိၣ်ဒီးဟ့ၣ်နီၤလီၤဝဲဆူပှၤလၢတၢ်တအိၣ်တယၢၤတဖၣ်န့ၣ်လီၤ.ပှၤကိးဂၤဒဲးတူၢ်ဘၣ်ဝဲဒၣ်လၢ,တၢ်လၢအအိၣ်ဒီးအဝဲသ့ၣ်တဖၣ်န့ၣ်မ့ၢ်ပှၤခဲလၢာ်အတၢ်လီၤ.ပှၤတဂၤဒီးတဂၤန့ၣ်အိၣ်မူဝဲလၢပှၤအါဂၤအဂီၢ်လီၤ.တုၤမ့ၢ်ပှၤတၢ်အိၣ်တၢ်ယၢၤတဖၣ်ဆါလီၤကွံာ်အတၢ်စုလီၢ်ခီၣ်ခိၣ်ဒီး,စီၤအနၤနံဒီးနီၢ်စးဖံးရးဒီမါဝၤခံစ့ၢ်ကီးတၢ်ထိၣ်ဟူးထိၣ်ဂဲၤအသးလၢကဘၣ်ဆါကွံာ်အစုလီၢ်ခီၣ်ခိၣ်ဒီးလဲၤဟ့ၣ်ဝဲဆူတၢ်မၢဖိအအိၣ်န့ၣ်လီၤ.တၢ်လၢဆါဝဲန့ၢ်တဖၣ်န့ၣ်ပာ်ဃာ်ဝဲလၢအဂီၢ်တဝာ်ဒီးလဲၤစိာ်ဝဲဆူတၢ်မၢဖိအအိၣ်တဝာ်လီၤ.ဖျါလၢပှၤဒီမါဝၤခံဂၤအံၤအဲၣ်ဒိးဝဲလၢအမံၤကဟူထီၣ်စ့ၢ်ကီးလၢအဟ့ၣ်တၢ်အဃိလီၤ.

တၢ်မံၤဟူသၣ်ဖျါလၢတၢ်ဟ့ၣ်မၤဘူၣ်န့ၣ်မ့ၢ်တၢ်လီၤပျံၤဆံးဒိၣ်လဲၣ်.လၢတၢ်န့ၣ်အဃိကစၢ်ယွၤအကလုၢ်ကထါဒုးပလီၢ်ပှၤလၢ,စုထွဲအတၢ်ဟ့ၣ်န့ၣ်ဒုးသ့ၣ်ညါစုစ့ၣ်တဂ့ၤ.မ်ပှၤအါဂၤသ့ၣ်ညါဘၣ်ဝဲလၢပဒိးန့ၢ်တၢ်ဒီးပှၤတသ့ၣ်ညါနီတဂၤဘၣ်လၢပဟ့ၣ်တၢ်အဃိတက့ၢ်.

တၢ်ဟ့ၣ်မၤဘူၣ်တၢ်တဘၣ်မ့ၢ်တၢ်လၢပဂံၢ်ပဒွးအီၤသ့(ညုါနတၢတယ)န့ၣ်ဘၣ်.ကဘၣ်မ့ၢ်ဝဲသးအကံၢ်အစီ (သဲါရတ ညုါလၢတယ)အတၢ်ဟ့ၣ်လၢပဂံၢ်အီၤတသ့ဘၣ်န့ၣ်လီၤ.

If you want to be rich; give!

If you want to be poor; grasp!

If you want abundance; scatter!

If you want to be needy; hoard!

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. … အၤမ့ၤ