တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

တၢ်လီၢ်လၢတၢ်ဆိၣ်ဂ့ၤဘၣ်တသ့

စံးထီၣ်ပတြၢၤ 1:1, ပှၤလၢအတလဲၤဘၣ်ဝဲလၢပှၤတတီတလိၤဘၣ်အကူၣ်ထီၣ်ဖးလီၤတၢ်အပူၤ,ဒီးတဆၢထၢၣ်ဘၣ်ဝဲလၢပှၤမၤတၢ်ဒဲးဘးအကျဲ,ဒီးတဆ့ၣ်နီၤဘၣ်ဝဲလၢပှၤဒုးဒွဲၣ်တၢ်အလီၢ်ဆ့ၣ်နီၤဘၣ်န့ၣ်ဘၣ်ဆိၣ်ဂ့ၤဝဲလီၤ.

တၢ်လီၢ်လၢပအိၣ်ပဆိးလၢအပူၤကိးတီၤဒဲးန့ၣ်မ့ၢ်တၢ်လီၢ်လၢကစၢ်ယွၤဟ့ၣ်လီၤပှၤလၢပကအိၣ်မူဒီးမုာ် လၤသးခုလၢအပူၤန့ၣ်လီၤ.ဖဲပအိၣ်တပူၤဂ့ၤတပူၤဂ့ၤမ့ၢ်တၢ်ဆိၣ်ဂ့ၤလၢပဂီၢ်လီၤ.မ့ၢ်နာ်သက့ဒ်န့ၣ်ဒီးတၢ်လီၢ်လၢပှၤတတီတလိၤဘၣ်ကူၣ်ထီၣ်တၢ်အၢ,ပှၤမၤတၢ်ဒဲးဘးအလီၢ်,ပှၤဒုၣ်ဒွဲၣ်စံးအၢတၢ်အလီၢ်သ့ၣ်တဖၣ်န့ၣ်တၢ်ဆိၣ်ဂ့ၤဘၣ်တသ့ဘၣ်.ဟီၣ်ခိၣ်လၢပအိၣ်ပဆိးလၢအပူၤအံၤပူၤဖျဲးဝဲဒီးတၢ်လီၢ်သ့ၣ်တဖၣ်အံၤတသ့ဝဲနီတတီၤဘၣ်.ပမ့ၢ်ဟးဆှဲးတၢ်လီၢ်သ့ၣ်တဖၣ်အံၤဒီးပကဘၣ်ဟးထီၣ်ကွံာ်လၢဟီၣ်ခိၣ်တဖျၢၣ်အံၤအပူၤလီၤ.

အီးစထြ့လံယါထံကီၢ်အပဒိၣ်ပပှၢ်အါဂၤဂုာ်ကျဲးစၢးကူၣ်ထီၣ်တၢ်အၢတၢ်သီအါမးဒီးကျဲးစၢးဆှၢနုာ်ဝဲလၢတၢ်ကဆီတလဲကွံာ်တၢ်ဆီဟံၣ်ဆီဃီအခီပညီန့ၣ်လီၤ.အဝဲသ့ၣ်အဲၣ်ဒိးဒုးကဲထီၣ်ဝဲတၢ်ဆီဟံၣ်ဆီဃီန့ၣ်တမ့ၢ်ဘၣ်လၢပိာ်မုာ်ဒီးပိာ်ခွါဧိၤအဂီၢ်န့ၣ်ဘၣ်လီၤ.တုၤမ့ၢ်အတၢ်တိာ်ပာ်တဖၣ်လၢထီၣ်ပှဲၤထီၣ်ဒီးပကဟးဆှဲးကွံာ်အဝဲသ့ၣ်န့ၣ်တမ့ၢ်တၢ်လၢအညီဘၣ်.ပအိၣ်ဒၣ်လၢထံကီၢ်တဘ့ၣ်ဃီအပူၤလၢပကဘၣ်သူၣ်ထီၣ်ယွၤအဘီအမုၢ်န့ၣ်လီၤ.ထဲဒၣ်တမံၤဧိၤလၢပသးတဖျၢၣ်အံၤမ့ၢ်တအိၣ်လၢအဝဲသ့ၣ်ကူၣ်ထီၣ်ဖးလီၤတၢ်အပူၤ ဘၣ်ဒီးပမ့ၢ်ပှၤဘၣ်ဆိၣ်ဂ့ၤလီၤ.မ်ပကမ့ၢ်ဝဲၣ်လၢၢ်အဂ့ၤတဖျၢၣ်လၢပှၤသးပှၢ်ဒိဝဲလၢထါ”ကပံာ်ကျါလၢၢ်ဂ့ၤလီၤဘျၢ,လီၤဘျၢဘၣ်ဆၣ်တဘၣ်အၢ”,လၢၢ်န့ၣ်မ့ၢ်လီၤဘျၢလၢကပံာ်ကျါဘၣ်ဆၣ်,ပမ့ၢ်ထုးထီၣ်ကွံာ်အီၤဒီး မ့ၢ်ဒၣ်လၢၢ်လီၢ်လီၤ.

ပကဃုထံၣ်န့ၢ်တလီၢ်လၢအပူၤဖျဲးဒီးတၢ်ကူၣ်ထီၣ်ဖးလီၤလၢအအၢ,တဆၢထၢၣ်ဘၣ်လၢပှၤမၤတၢ်ဒဲးဘးအကျဲ,တဆ့ၣ်နီၤဘၣ်လၢပှၤဒုၣ်ဒွဲၣ်တၢ်အလီၢ်ဆ့ၣ်နီၤဘၣ်န့ၣ်မ့ၢ်တၢ်လၢအကီဝဲမးလီၤ.မ့ၢ်နာ်သက့ဒ်န့ၣ်ဒီးပနီၢ်ခိမ့ၢ်တပူၤဖျဲးလၢတၢ်လီၢ်သ့ၣ်တဖၣ်အံၤဘၣ်ဆၣ်ပသးမ့ၢ်ပူၤဖျဲးဒီးတၢ်လီၢ်သ့ၣ်တဖၣ်အံၤဒီးပမ့ၢ်ပှၤဘၣ်ဆိၣ်ဂ့ၤလၢယွၤလီၤ.

တၢ်ထုကဖၣ်- ပၢ်ကစၢ်ယွၤဧၢ,ပစံးဘျုးနၤလၢနပာ်လီၤပှၤလၢတၢ်လီၢ်သ့ၣ်တဖၣ်လၢပကမူဒီးမၤဘၣ်နတၢ်သးခုကစီၣ် လၢဟီၣ်ခိၣ်အံၤန့ၣ်လီၤ.ပသ့ၣ်ညါလၢတၢ်လီၢ်လၢကပူၤဖျဲးဒီးတၢ်အၢတၢ်သီန့ၣ်တအိၣ်ဘၣ်နီတတီၤဘၣ်.ဒ်လၢမူခိၣ်တၢ်မၤသးအသိးန့ၣ်လၢဟီၣ်ခိၣ်တၢ်ကမၤအသးဒ်န့ၣ်အသိးစ့ၢ်ကီးအဂီၢ်န့ၣ်ပဃ့နၤလီၤ.လၢထွံၣ် မံၤဒီးတၢ်ဒူတၢ်ဃိၤသ့ၣ်တဖၣ်အကျါန့ၣ်မၤစၢၤပှၤဒ်သိးပကကူၣ်တၢ်သ့ဒ်ဂုၢ်ဒီးကဆှီဒ်ထိၣ်လွံၢ်အသိးန့ၣ်တက့ၢ်.လၢယ့ၣ်ၡူးခရံာ်အမံၤပစံးဘျုးနၤဒီးပဃ့နၤလီၤ.အၤမ့ၤ

ယွၤသၢဂၤတဂၤဃီအတၢ်ဃူတၢ်ဖိးအိၣ်ဒီးသုထီဘိ… အၤမ့ၤ