တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

ဟံၣ်မုာ်ဃီပၢၤမၤသးဒ်ဆီမိၢ်ပှၢ်ဟုဃာ်အဖိ

မးသဲ 23:37

ယရူၤဂှလ့ၣ်ဧၢ,ယရူၤဂှလ့ၣ်ဧၢ,နဲဒၣ်အံၤ,နမၤသံဝံတဖၣ်,ဒီးပှၤလၢတၢ်မၢလီၤအီၤဆူနအိၣ်တဖၣ်န့ၣ်,နကွံာ်အီၤလၢလၢၢ်လီၤ.ဒ်ဆီမိၢ်ပှၢ်ဒုးအိၣ်ဖှိၣ်အဖိလၢအဒံးဆ့လာ်အသိးန့ၣ်,တၢ်မိၣ်ဒုးအိၣ်ဖှိၣ်ဘၣ်ယသးလၢနဖိတဖၣ်အဘျီဆံးအါလဲၣ်.မ့မ့ၢ်နဲဒၣ်အံၤနသးတအိၣ်ဘၣ်.

ဟံၣ်မုာ်ဃီပၢၤန့ၣ်တဒိးသန့ၤအသးလၢဟံၣ်ဒိၣ်ကျိၤသွါ,ဒီးတၢ်ကယၢကယဲအီၤဂ့ၤဂ့ၤဘၣ်ဘၣ်အဃိန့ၣ်ဘၣ်.ဒိးသန့ၤထီၣ်အသးလၢပှၤလၢအိၣ်ဆိးဝဲလၢအပူၤတဖၣ်န့ၣ်လီၤ.ဟံၣ်မုာ်ဃီပၢၤန့ၣ်ဒိးသန့ၤထီၣ်အသးလၢမိၢ်ပၢ်ခံဂၤန့ၣ်လီၤ.ပှၤသးပှၢ်စံးဝဲ,တၢ်လၢမိၢ်ပၢ်န့ၣ်မ့ၢ်ဒၣ်ထိၣ်မိၢ်ဟု,ဆီမိၢ်ပှၢ်န့ၣ်လီၤ.ဟံၣ်ဃီအတၢ်အိၣ်ကူအိၣ်လၢ,ကျိၣ်စ့အတၢ်ဟဲနုာ်ဘၣ်လီၢ်ဘၣ်စး,တၢ်ကူၣ်ဘၣ်ကူၣ်သ့အတီၤပတီၢ်ထီၣ်ဘးတဖၣ်န့ၣ်တဒုးကဲ ထီၣ်ဟံၣ်တဖျၢၣ်လၢဟံၣ်မုာ်ဃီပၢၤဘၣ်လီၤ.ဆၢကတီၢ်ခဲအံၤဟံၣ်ဖိဃီဖိအါဒံအါဂၤဘၣ်အိၣ်လၢတၢ်တဃူတဖိးအပူၤ,တၢ်လီၤမုၢ်လီၤဖး,ဖိသ့ၣ်တဖၣ်တသးအိၣ်ဆၢဟဲက့ၤလၢအဟံၣ်ဘၣ်.

ကစၢ်ယ့ၣ်ၡူးမ့မ့ၢ်ပဟံၣ်အခိၣ်ဒီးကမၤသးဒ်ဆီမိၢ်ပှၢ်လၢအဖိးဟုအဖိလၢအဒံးဆ့လာ်အသိးန့ၣ်လီၤ.တုၤမ့ၢ်တၢ်စူၤလီၤဒီးဆီမိၢ်ပှၢ်ကိးဖှိၣ်က့ၤအဖိတဘျီဃီဒီးအဖိခဲလၢဟဲက့ၤဆူအဒံးဆ့ဖီလာ်လီၤ.ဟံၣ်ဖိဃီဖိအတၢ်အိၣ်ကၢအိၣ်ခိးန့ၣ်မ့ၢ်တၢ်အိၣ်ဖှိၣ်အလၤကပီၤဒီးတၢ်အိၣ်ဖှိၣ်အတၢ်မူထီၣ်ဂဲၤထီၣ်န့ၣ်လီၤ.တုၤမ့ၢ်ဟံၣ်ဖိဃီဖိတအိၣ်ဂၢၢ်ဆိးကျၢၤဒီးတၢ်အိၣ်ဖှိၣ်ဒီတဖုဘၣ်ဒိဘၣ်ထံးဒီးဆံးလီၤစှၤလီၤဝဲလီၤ.မ့ၢ်တၢ်အကါဒိၣ်လၢမိၢ်ပၢ်တဖၣ်ကပာ်သူၣ်ပာ်သးဒီးဒိးပၢဒိးဆှၢသးလၢခရံာ်အတၢ်စိတၢ်ကမီၤအဖီလာ်န့ၣ်လီၤ.ဖဲခရံာ်ပၢတၢ်လၢဟံၣ်ပူၤန့ၣ်ပဖိသ့ၣ်တဖၣ်ဆၢဟဲက့ၤတုၤဝဲလၢဟံၣ်ထီဘိဖဲလၢအဝဲသ့ၣ်ဟးယံၤဒီးဟံၣ်အဆၢကတီၢ်န့ၣ်လီၤ.ပှၤသးပှၢ်ကတိၤဒိတ့ၢ်ဝဲ,”ထံခုၣ်ညၣ်ရိ,ဒီးထံကိၢ်ညၣ်ပြါ”ဝဲလီၤ.ဆၢကကီၢ်ဘၣ်လံဝဲလၢပကဘၣ်မၤမူထီၣ်က့ၤပဟံၣ်ဖိဃီဖိနီၢ်နီၢ်လံန့ၣ်လီၤ.ကစၢ်ယ့ၣ်ၡူးသးအိၣ်ကဲထီၣ်ပဟံၣ်အခိၣ်န့ၣ်လီၤ.မ့ၢ်ပတူၢ်လိာ်အီၤလံဧါ.

တၢ်ထုကဖၣ် - 

ပၢ်ကစၢ်ယွၤဧၢ,ယစံးဘျုးနၤလၢနဟ့ၣ်ယၤလၢဟံၣ်ဖိဃီဖိအဃိလီၤ.ဆိၣ်ဂ့ၤပဟံၣ်ဖိဃီဖိဒီးပၢဘၣ်အီၤတက့ၢ်. လၢယ့ၣ်ၡူးခရံာ်အမံၤယစံးဘျုးဒီးယဃ့နၤလီၤ.အၤမ့ၤ

မ်ယွၤဆိၣ်ဂ့ၤနၤဒီးကွၢ်က့ၤနၤတက့ၢ်… အၤမ့ၤ