တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

တၢ်လီၢ်လၢယွၤနၢ်ဟူပတၢ်ထုကဖၣ်တသ့လၢၤဘၣ်န့ၣ်အိၣ်ဧါ

လံာ်ယိၤနါ 2:6; ယလဲၤလီၤဆူကစၢၢ်အခီၣ်ထံး,ဟီၣ်ခိၣ်အနီၣ်ဘိကးတံာ်ဃာ်ယၤလီၤထူလီၤယိာ်လီၤ. ဘၣ်ဆၣ်ဒီးနဒုးဟဲထီၣ်ယသးသမူလၢတၢ်ဟးဂီၤအပူၤ, ယွၤယကစၢ်ဧၢ.

စီၤယိၤနါအိၣ်ဘၣ်ဝဲလၢညၣ်အဟၢဖၢပူၤ,ဘၣ်ဆၣ်တသးပ့ၤနီၣ်ယွၤကစၢ်လၢအပၢဆှၢအတၢ်အိၣ်မူတဂၤန့ၣ်ဘၣ်.အတၢ်ထုကဖၣ်သကွံၢ်ကညးသီၣ်ထီၣ်ဒံးဝဲလၢအထးခိၣ်,အိၣ်ပှဲၤဒီးတၢ်သကွံၢ်ကညးလီၤ.တၢ်လီၢ်လၢစီၤယိၤနါတုၤဃီၤဝဲအခဲအံၤန့ၣ်တမ့ၢ်သရိာ်ပူၤ,တမ့ၢ်တၢ်လီၢ်လၢတၢ်ဘူၣ်သကိးဘါသကိးအလီၢ်,တမ့ၢ်တၢ်လီၢ်လၢပှၤဟီၣ်ခိၣ်ဖိထံၣ်ဝဲလၢအစီဆှံလၢပကရ့လိာ်ပသးဒီးယွၤအဂီၢ်န့ၣ်ဘၣ်.မ့ၢ်ပျုၤအတၢ်ယိာ်ပူၤ,တၢ်သံအလီၢ်ဒီးတမ့ၢ်လၢဟဲက့ၤမူထီၣ်သ့လၢၤဘၣ်န့ၣ်လီၤ.ဘၣ်ဆၣ်ယွၤတကွၢ်ဝဲပအိၣ်တၢ်လီၢ်လၢအ ဘၣ်အဃိမးကဒိကနၣ်ပှၤန့ၣ်တမ့ၢ်ဘၣ်. ဖဲနဖးဘၣ်တၢ်ကစီၣ်အံၤအခါန့ၣ်မ့ၢ်နသးအိၣ်ဘၣ်တၢ်လီၢ်ဖဲလဲၣ်.မ့ၢ်နသးအိၣ်ဝဲလၢတၢ်သယုၢ်သညိအလီၢ်,တၢ်အိမူၤအိဘှီးသးအလီၢ်,တၢ်ကလုၢ်ကလိၤအလီၢ်,တၢ်တၤကျိၣ်တၤစ့အလီၢ်,တၢ်အ့ၣ်လိာ်ဆိးက့လိာ်သးအလီၢ်န့ၣ်ဧါ.နမ့ၢ်အိၣ်ဘၣ်လၢတၢ်လီၢ်သ့ၣ်တဖၣ်အံၤဒီးကိးဘၣ်လီတဲစိနီၢ်ဂံၢ်”333”ပှၤလၢကစံးဆၢပှၤဒီးဒိကနၣ်ပှၤန့ၣ်အိၣ်ကတီၤအသးထီဘိလီၤ.ဝံယံးရမံယၤ33:3,ကိးထီၣ်ယၤတက့ၢ်,ဒီးယကစံးဆၢနၤ,ဒီးယကဒုးနဲၣ်နၤလၢတၢ်အဒိၣ်အထီ,ဒီးတၢ်လီၤလးတဖၣ်,လၢနတသ့ၣ်ညါဘၣ်လီၤ.

စီၤဒၤဝံးဘါထုကဖၣ်တၢ်ဒီးစံးဝဲ,ယကလဲၤပူၤကွံာ်လၢနသးဆူလဲၣ်.ဒီးယကဃ့ၢ်ပူၤကွံာ်လၢနမဲာ်ညါဆူလဲၣ်.ယမ့ၢ်လဲၤထီၣ်ဘးလၢမူခိၣ်ဒီး,နအိၣ်ဖဲန့ၣ်လီၤယမ့ၢ်ဒါလီယလီၢ်မံလၢပျုၤပူၤဒီးကွၢ်ကွၢ်,နအိၣ်ဖဲန့ၣ်လီၤ.ယ မ့ၢ်ဟံးန့ၢ်မုၢ်ဂီၤအဒံးဆ့,ဒီးအိၣ်လၢပီၣ်လဲၣ်အကတၢၢ်ဒီး,နစုကဆှၢယၤဖဲန့ၣ်စ့ၢ်ကီး,ဒီးနစုထွဲကဟံးဃာ် ယၤလီၤ.စံးထီၣ်ပတြၢၤ139:7-10.

တၢ်လီၢ်လၢကပာ်သဒၢပှၤလၢယွၤအမဲာ်ညါန့ၣ်တအိၣ်ဘၣ်နီတမံၤဘၣ်.တၢ်လီၢ်လၢယွၤနၢ်ဟူပတၢ်ထုကဖၣ်တသ့လၢၤဘၣ်,တဟူလၢၤဘၣ်န့ၣ်တအိၣ်ဘၣ်နီတမံၤဘၣ်.လၢတၢ်ပီၢ်ယၢ်လီၤသးဒီးတၢ်ဆီၣ်လီၤသးနီၢ်နီၢ်အပူၤန့ၣ်ကိးထီၣ်ယွၤတက့ၢ်.အဝဲဒၣ်အိၣ်ခိးဒိကနၣ်ပှၤဒီးကပျၢ်ပတၢ်အါအါကလဲာ်လီၤ.ယွၤတဂၤဃီလၢအထုးထီၣ်ကွံာ်စီၤယိၤနါလၢပျုၤအတၢ်ယိာ်ပူၤ,လၢပီၣ်လဲၣ်အခံဒးဒၣ်လဲာ်သ့ဝဲန့ၣ်,ကထုးထီၣ်ကွံာ်နၤပျုၤပူၤအတၢ်အိမူၤအိဘှီးအလီၢ်,တၢ်ကလုၢ်ကလိၤအလီၢ်,တၢ်တၤကျိၣ်တၤစ့အလီၢ်,တၢ်အ့ၣ်လိာ်ဆိးက့လိာ်အလီၢ်,တၢ်မၤနၢၤအီၣ်ဃီၢ်ဖိမါအလီိၢ်သ့ဝဲတဘျီဃီခဲအံၤလီၤ.ထဲဒၣ်ကိးထီၣ်ယ့ၣ်ၡူးခရံာ်အမံၤတက့ၢ်.

တၢ်ထုကဖၣ်- ပၢ်ကစၢ်ယွၤဧၢ,ယစံးဘျုးနၤလၢနဒိကနၣ်ပှၤထီဘိအဃိလီၤ.ပမ့ၢ်အိၣ်ဘၣ်လၢတၢ်လီၢ်လၢအတဘၣ်,တၢ်လီၢ်လၢတၢ်သံပျုၤပူၤအတၢ်ယိာ်ဒၣ်လဲာ်နအိၣ်ခိးဒိကနၣ်ပှၤလီၤ.လၢယ့ၣ်ၡူးခရံာ်အမံၤယစံးဘျုးနၤဒီးယဃ့နၤဒိကနၣ်ဘၣ်ယတၢ်ထုကဖၣ်တက့ၢ်. အၤမ့ၤ

နံၣ်သီလါသီအတၢ်ဃူတၢ်ဖိးအိၣ်ဒီးသုထီဘိ… အၤမ့ၤ