တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

တၢ်အဲၣ်

ယိၤဟၣ် 13 : 35

လၢသုအဲၣ်လိာ်ကွံလိာ်သုသးအဃိဒီး,ပှၤခဲလၢာ်ကသ့ၣ်ညါလၢသုမ့ၢ်ယပျဲၢ်ယဘီၣ်လီၤ.

လၢဟီၣ်ခိၣ်အံၤပှၤကိးဂၤသ့ၣ်ညါတၢ်အဲၣ်ဒီးတၢ်ဘၣ်တ့ခဲလၢာ်လိၣ်ဘၣ်တၢ်အဲၣ်လီၤ.တၢ်အဲၣ်မ့ၢ်တၢ်လၢအဂ့ၤဒီးပှၤကိးဂၤဆၢန့ၢ်ဘၣ်ဝဲလီၤ.တၢ်အဲၣ်အံၤအလွဲၢ်မၤအသးဒ်လဲၣ်,အစိနၢဒ်လဲၣ်,အက့ၢ်အဂီၤအိၣ်ဒ်လဲၣ်,ပှၤတဲတသ့,တထံၣ်ဘၣ်,တသ့ၣ်ညါဝဲနီတဂၤဘၣ်.ထဲဒၣ်နၢ်ဟူတၢ်အသီၣ်ဒီးသ့ၣ်ညါဒၣ်လၢသးအတၢ်နၢ်ပၢၢ်အပူၤလီၤ.ယဆိမိၣ်တၢ်အဲၣ်ကအိၣ်ဝဲခံမံၤလီၤ.တၢ်အဲၣ်တီဒီးတၢ်အဲၣ်လီန့ၣ်လီၤ.ကွၢ်ကပာ်ကွံာ်သကိးတၢ်အဲၣ်လီဒီးကွၢ်ဆိကမိၣ်တၢ်အဲၣ်တီတက့ၢ်.

တၢ်အဲၣ်အိၣ်ဝဲအါကလုာ်ဒီးအပတီၢ်လီၤဆီစ့ၢ်ကီးဝဲလီၤ.မိၢ်ပၢ်ဖံဖုတၢ်အဲၣ်,ဒီပုၢ်ဝဲၢ်ဘူးတံၢ်တၢ်အဲၣ်,တံၤသကိးပှၤတဝၢတၢ်အဲၣ်,ခိၣ်နၢ်သူၣ်က့သးပှၢ်သရၣ်သမါတၢ်အဲၣ်,နီၢ်ဒီမါဝၤတၢ်အဲၣ်ဒီးအဂၤတဖၣ်လီၤ.ပဝဲကညီကလုာ်လၢကီၢ်ပယီၤကီၢ်သူလ့ၤတဖၣ်ပဘၣ်လဲၤခီဖျိပတၢ်အိၣ်မူခၣ်ဖးဒိၣ်လီၤပစံးဒၣ်ကလိာ်ဖဲပအိၣ်လၢဒဲကဝီၤပူၤအခါန့ၣ်တံၤသကိးလီၤဆီတဂၤကဟဲဟ့ၣ်ပှၤကၠီၣ်တဲၣ်စ့တကကွဲၢ်ဒီးကစံးပှၤ,တံၤသကိးဧၢၤ,ယဟ့ၣ်နၤဒီးမ့ၢ်နတၢ်လီၤ.ဖဲနကဆိးကါတၢ်တြီတအိၣ်ဘၣ်.နသးခုဘၣ်ဆၣ်တၢ်ဘၣ်ယိၣ်ကအိၣ်ဒီးနၤလီၤ.

ဒဲကဝီၤတမ့ၢ်တၢ်လီၢ်လီၤစိၤနသ့ၣ်ညါဒီးနကစိာ်ထီၣ်စ့အံၤလၢနကလူၤဃုတစိၤသးတၢ်အိာ်မူလၢတၢ်မုာ်ဒီးတၢ်ပူၤဖျဲးအဂီၢ်လီၤ.နဟဲကတုၤဘီကိးဒၣ်ကယၢာ်,ဆူညါတညီလၢၤဘၣ်.လၢယွၤတၢ်အဲၣ်ဒိၣ်အဃိ,အိးထီၣ်န့ၢ်ပပှၤကညီကလုာ်လၢမူခိၣ်တၢ်ထူၣ်ဖျိတၢ်ဆိၣ်ဂ့ၤလၢပှၤသမၢတသ့,သမၢအလီၢ်တအိၣ်နီတဂၤဘၣ်န့ၣ်လီၤ.ခံဆံတၢယၤဖှိၣ်နံၣ်ထီၣ်တဘျီထံကီၢ်တဖၣ်လဲၤကိးန့ၢ်ပှၤလၢဒဲကဝီၤပူၤတုၤဆူဟီၣ်ခိၣ်ပတီၢ်တၢထံကီၢ်အါဘ့ၣ်အပူၤလီၤ.အဝဲအံၤမ့ၢ်ပတုၤဆူတစိၤသးဟီၣ်ခိၣ်တၢ်မုာ်အလီၢ်န့ၣ်လီၤ.ထံကီၢ်တဖၣ်အံၤမ့ၢ်စ့ၢ်ကီးပှၤဟီၣ်ခိၣ်ဖိဒ်ပဝဲအသိးဒီးဟ့ၣ်ပှၤသ့ဒၣ်ထဲတစိၤသးတၢ်အဲၣ်လီၤ.

ဒီပုၢ်ဝဲၢ်တံၤသကိးသးဘိသ့ၣ်ဧၢ,ပလိၣ်ဘၣ်တၢ်အဲၣ်လီၤထူလီၤယိာ်စ့ၢ်ကီးဧါ.လီၤထူလီၤယိာ်တၢ်အဲၣ်အံၤမ့ၢ်မတၤဟ့ၣ်ပှၤသ့တဂၤလဲၣ်,ပှၤခရံာ်ဖိတဖၣ်ကစၢ်မၣ်လိာ်အီၤ,သုမ့ၢ်အဲၣ်ယၤဒီးတိၢ်န့ၢ်ယတၢ်မၤလိာ်တက့ၢ်.အဲၣ်လိာ်သုသးသကိးသကိးဒ်ယအဲၣ်သုအသိးတက့ၢ်.ယွၤအလံာ်ခိၣ်ဆၢၣ်ကွဲးဝဲ,အဲၣ်ယွၤနကစၢ်လၢနသူၣ်ကံၢ်သးလဲ,နသးဒီဖျၢၣ်တက့ၢ်.တၢ်အဲၣ်အနီၢ်အသံး,အလၢအပှဲၤမ့ၢ်ဒၣ်လီၤထူလီၤယိာ်ယွၤအတၢ်အဲၣ်လီၤ.

ယွၤဆိၣ်ဂ့ၤသုကိးဂၤ

တံကရၣ်