တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

တၢ်စိတၢ်ကမီၤလီၤဆီ

မၢ်ကူး 16 : 18

ကဟံးထီၣ်ဂုၢ်ဧိၤဒးဧိၤ, ဒီးမ့ၢ်အီတၢ်မူၤသံဘၣ်ဆၣ်ဒီး, တဘၣ်ဘၣ်တၢ်နီတမံၤဘၣ်. ကပာ်ထီၣ်အစုလၢ ပှၤဆူးပှၤဆါတဖၣ်အလိၤ, ဒီးကဘျါက့ၤဝဲလီၤ.

ဖဲပတူၢ်လိာ်ကစၢ်ယ့ၣ်ၡူးလၢပတၢ်အိၣ်မူအပူၤန့ၣ်မ့ၢ်ပပလၢၢ်ဘၣ်တၢ်စိတၢ်ကမီၤလီၤဆီဒီးပှၤတမံၤမံၤဧါ,ဖဲပတူၢ်လိာ်ယ့ၣ်ၡူးလၢကကဲထီၣ်ပကစၢ်လၢပတၢ်အိၣ်မူအဂီၢ်န့ၣ်အါဒၣ်တက့ၢ်ပှၤအါသ့ၣ်ညါလီၤတံၢ်ဝဲလၢပဒိးန့ၢ်ဘၣ်လံတၢ်အုၣ်က့ၤခီၣ်က့ၤန့ၣ်လီၤ.ယွၤအတၢ်ဟ့ၣ်န့ၣ်မ့ၢ်တၢ်လၢအဒိၣ်န့ၢ်အါန့ၣ်အဝဲန့ၣ်တက့ၢ်လီၤ.အဝဲဒၣ်ဟ့ၣ်ပှၤလၢတၢ်မူအထူအယိာ်တကးဘၣ်အမဲာ်ညါဟ့ၣ်ပှၤလၢတၢ်စိတၢ်ကမီၤန့ၣ်လီၤ.ပှၤခရံာ်ဖိခဲလၢာ်မ့ၢ်သ့ၣ်ညါလီၤအသးအအိၣ်ဒီးတၢ်စိတၢ်မီၤဒီးကသးခုဝဲထဲလဲၣ်.တဘၣ်တဲလၢတၢ်စိတၢ်ကမီၤအဂ့ၢ်ဘၣ်,ပှၤဒိးကိးလီၤအသးလၢခရံာ်ဖိအါဂၤလၢအတသ့ၣ်ညါလီၤတံၢ်အတၢ်အုၣ်က့ၤခီၣ်က့ၤအဂ့ၢ်ဒံးဘၣ်န့ၣ်အိၣ်ဝဲလီၤ.ဒီးတနီၤနီၤသးဒ့ဒီဒံးဝဲလၢမ့ၢ်အဒိးန့ၢ်ဘၣ်တၢ်အုၣ်က့ၤခီၣ်က့ၤလံဧါန့ၣ်လီၤ.

သ့ၣ်ညါလီၤတံၢ်လၢဖဲနအၢၣ်လီၤတူၢ်လိာ်လံခရံာ်န့ၣ်,တၢ်အုၣ်က့ၤခီၣ်က့ၤလၢနဂီၢ်အိၣ်လၢပှဲၤဝဲလီၤ.တကးဘၣ်ပကစၢ်ယ့ၣ်ၡူးဟ့ၣ်လီၤစ့ၢ်ကီးပှၤတၢ်စိတၢ်ကမီၤလၢလၢပှဲၤပှဲၤလၢပကဟ့ၣ်တၢ်သးခုဆူပှၤအဂၤဒီးကဲထီၣ်တၢ်မၤစၢၤလၢအဝဲသ့ၣ်အဂီၢ်န့ၣ်လီၤ.ပမ့ၢ်ပာ်ထီၣ်ပစုလၢပှၤဆူးပှၤဆါအလိၤဒီးကဘျါက့ၤဝဲလီၤ.တၢ်စိတၢ်ကမီၤဒ်အံၤန့ၣ်ပဒိးန့ၢ်ဘၣ်အီၤသ့လၢပအိၣ်မူထီၣ်ဘးယွၤအတၢ်ဘၣ်သးအဃိတမ့ၢ်ဘၣ်.ထဲဒၣ်ပဟ့ၣ်လီၤကွံာ်ပတၢ်အိၣ်မူလၢအဝဲဒၣ်အပူၤလၢာ်လၢာ်ဆ့ဆ့အဃိန့ၣ်လီၤ.ဒ်သိးပတၢ်အိၣ်မူကထီၣ်ဘးယွၤတၢ်ဘၣ်သးန့ၣ်ပလူၤအီၤတန့ၢ်ဘၣ်.ယွၤအတၢ်ဟ့ၣ်န့ၣ်မ့ၢ်တၢ်မူအထူအယိာ်ဒီးတၢ်စိတၢ်ကမီၤလီၤ.ယွၤအတၢ်ဟ့ၣ်န့ၣ်ပလူၤမၤန့ၢ်အီၤတသ့ၣ်ဘၣ်,ထဲဒၣ်ပဘၣ်တူၢ်လိာ်အီၤန့ၣ်လီၤ.

ယိၤဟၣ် 1 : 12 ဖဲဒၣ်ပှၤလၢအတူၢ်လိာ်အီၤ, ပှၤလၢအစူၢ်က့ၤနာ်က့ၤအမံၤတဖၣ်န့ၣ်, ဟ့ၣ်ဝဲလၢအစိ အကမီၤ, ဒ်သိးအကကဲထီၣ်ယွၤအဖိလီၤ. ပှၤတဖၣ်န့ၣ်အိၣ်ဖျဲၣ်လၢတၢ်သွံၣ်တမ့ၢ်ဘၣ်, လၢတၢ်ညၣ်အသးတမ့ၢ်ဘၣ်, လၢပှၤကညီအသးတမ့ၢ်ဘၣ်, မ့ၢ်ဝဲလၢယွၤလီၤ.

လၢပဟံၣ်ဖိဃီဖိအကျါ,လၢပပှၤတဝၢပူၤ,လၢပတၢ်အိၣ်ဖှိၣ်အပူၤ,ပှၤဆူးပှၤဆါမ့ၢ်အိၣ်ဘၣ်ဖုးတဂၤဂၤဒီးမ့ၢ်တၢ်အလီၢ်အိၣ်ဝဲလၢပကဘၣ်ဆၢဂ့ၤဆၢဝါအီၤလၢယွၤအမံၤ,ပာ်ထီၣ်အစုလၢအလိၤ,ဘါထုကဖၣ်လၢအဂီၢ်န့ၣ်လီၤ.တၢ်ဆူးတၢ်ဆါကဘျါက့ၤဝဲသပှၢ်တၢၢ်လၢခရံာ်အမံၤအဃိလီၤ.ဆၢကတီၢ်မုၢ်မဆါတနံၤအံၤပှၤဃုဒၣ်ထဲလၢကသံၣ်ကသီလၢဂ့ၤ,ကသံၣ်သရၣ်လၢအဖၠဲးလီၤ.မ့မ့ၢ်ပှၤလၢအတ့လီၤကသံၣ်ဒီးဟ့ၣ်က သံၣ်သရၣ်အသးသမူတဂၤန့ၣ်ပှၤလဲၤကပာ်ကွံာ်အီၤလီၤ.

မ်ယွၤဆိၣ်ဂ့ၤသုဝဲလၢအမ့ၢ်ယွၤအပှၤစီဆှံခဲလၢာ်တက့ၢ်. … အၤမ့ၤ