တနွံအံၤတၢ်ကစီၣ်လၢပကစိာ်မူအီၤမ့ၢ်ဝဲ

တၢ်မုၢ်လၢ်

လၢတၢ်မုၢ်လၢ်အပူၤန့ၣ်သးခုတက့ၢ်. ရိမ့ၤ 12 : 12

တၢ်သးလီ,တၢ်အဲၣ်တၢ်ဒိး,တၢ်လိၣ်ဘၣ်,တၢ်ဆၢန့ၢ်တဖၣ်န့ၣ်မ့ၢ်ဝဲတၢ်မုၢ်လၢ်အဒ့အဖီလီၤ.ပှၤကိးဂၤအိၣ်ဒီးအတၢ်မုၢ်လၢ်လၢခါဆူညါအဂီၢ်လီၤ.ပှၤကိးဂၤမၤတၢ်လၢ,အနီၢ်ကစၢ်ဂီၢ်,အပှၤဟံၣ်ဖိဂီၢ်,ပှၤတဝၢ,တၢ်ကရၢကရိတခါခါအဂီၢ်တမ့ၢ်ဘၣ်ဧါ.တၢ်လၢပမၤတဖၣ်,ပမုၢ်လၢ်လၢပကထံၣ်ဘၣ်က့ၤအဘျုးအဖှိၣ်,အသၣ်အဖီတမ့ၢ်ဘၣ်ဧါ,ပှၤထူစံာ်ဖဲးခုးတဖၣ်မုၢ်လၢ်ဒီးဆၢထံၣ်ဘၣ်က့ၤဝဲအတၢ်ချံတၢ်သၣ်လီၤ.ပှၤကိးဂၤတုၤအဆၢကတီၢ်ဘၣ်ဒီးဃုထၢအသးသမူတံၤသကိး,ဆီဟံၣ်ဆီဃီ,အိၣ်ဒီးတၢ်မုၢ်လၢ်ဖးဒိၣ်လၢကန့ၢ်ဘၣ်အစၢၤအသွဲၣ်သီအဂီၢ်လီၤ.

ပမှံၤပှၢ်တၢ်ကတိၤ,မုၢ်လၢ်ပျုုၤသံတမၤဘၣ်ထါဘၣ်.တၢ်အံၤတမ့ၢ်တၢ်ကီကဲၣ်ဆိးဒီးတၢ်ညီကဒၣ်စ့ၢ်ကီးဘၣ်.ပှၤတဂၤလၢအသးသမူတအိၣ်လၢၤဘၣ်န့ၣ်ပမုၢ်လၢ်တၢ်လၢအီၤကသ့ဒ်လဲၣ်,ပှၤခရံာ်ဖိတဂၤမ့ၢ်နာ်ကဖှီထံတၢ်လီန့ၣ်အခီပညီတအိၣ်တၢ်နီတမံၤဘၣ်.ယ့ၣ်ၡူးကစၢ်မ့ၢ်သံဒံးပှၤဟီၣ်ခိၣ်ဖိတဂၤအသိးမ့တမ့ၢ်ဒ်ကစၢ်အဂၤတဖၣ်အသိးန့ၣ်,တလိၣ်လၢပကဘၣ်စူၢ်နာ်ဒီးဘူၣ်ဘါအီၤစ့ၢ်ကီးဘၣ်.ယွၤအလံာ်ခိၣ်ဆၢၣ်အုၣ်အသးလီၤတံၢ်လီၤဆဲးလၢယ့ၣ်ၡူးခရံာ်မၤနၢၤတၢ်သံမူထီၣ်က့ၤဒီးက့ၤထီၣ်ဆူမူခိၣ်န့ၣ်ပှၤယဲၢ်ကယၤဘျဲၣ်ထံၣ်ဘၣ်အီၤပှဲၤမဲာ်လီၤ.လၢတၢ်အံၤအဃိပနာ်တၢ်ဒီးပမုၢ်လၢ်ဆၢန့ၢ်ဘၣ်,ဆၢတုၤဆၢအိၣ်ဘၣ်လၢယွၤဂီၤထံးလီၤ.

ပမ့ၢ်သ့ၣ်ညါလၢတၢ်တခါအံၤအဘျုးတအိၣ်ဘၣ်န့ၣ်မၤဘှံးပသးတဂ့ၤ.ပှၤထီၣ်သ့ၣ်တဂၤန့ၣ်ကထီၣ်မုာ်ဒိးဝဲ,ထီၣ်ကၠီးလိအသး,ထီၣ်ဒဲးဖီ,ထီၣ်ကွၢ်စိတၢ်,ထီၣ်ကျီၤဝဲအဒ့ဒီးအဂၤကအိၣ်ဒံးဝဲအါမံၤလီၤ.အတၢ်မုၢ်လၢ်မ့ၢ်တအိၣ်နီတမံၤန့ၣ်တထီၣ်ဝဲဒၣ်ဘၣ်.ပှၤတဂၤလီၤတဲာ်လၢကွံပူၤမ့ၢ်မၤလီၤစုာ်ဃုာ်အသးဒီးအိၣ်ဒၣ်ကဘၣ်သံလီၤ.မ့ၢ်ကျဲးစၢးဟူးဂဲၤဝဲတမံၤမံၤဒီးကတုၤလၢတကၢၢ်နံၤလီၤ.ပှၤကိးဂၤဖဲအတၢ်မုၢ်လၢ်အိၣ်တသ့လၢၤနီတမံၤအခါန့ၣ်မုၢ်လၢ်က့ၤတၢ်ထဲယွၤအတၢ်မၤစၢၤလီၤ.သးသမူမ့ၢ်အိၣ်ဒံးန့ၣ်တၢ်မုၢ်လၢ်အိၣ်ဝဲထီဘိလီၤ.

ယွၤဆိၣ်ဂ့ၤသုကိးဂး

လၢတံကရၣ်